華華尋日一早過海，因為有兩單大嘢，一單係8號仔開財經台，一單係鄭明訓搞既「十一‧五」論壇。前者有特首主禮，後者有肥龍捧場，但撞正時間，正猶豫去邊度好，見到華潤大廈外有人示威，於是決定先去論壇。
行埋去一睇，原來係二十幾個「領匯監察」成員，帶住個紅波向鄭明訓請願，要求佢查吓領匯上市時迫走啲租戶。華華其實好唔明，領匯做商場，做得好最不利嘅係現時控制住大商場幾個大地產商，到時競爭大咗，要加租就難咗。但啲「小市民」就成日搞一間私營咗，由公眾做股東嘅公司，而啲大商家嘅商場，就點加租都冇人理。
講番個論壇，第十一個五年計劃，將香港納入規劃範圍，人大副委員長許嘉璐噚日仲特登落嚟香港解釋，佢就好畀心機講解，又用PowerPoint，又嘗試用廣東話講。相反主人家嘅肥龍就幾求其，台下唔少人來自內地，但肥龍連國語都唔講，都唔知人哋聽得明幾多？
許副委員長話，雖然五年計劃話支持香港做金融、貿易同航運中心，唔代表中央淨係支持呢三樣，唔支持香港搞其他嘢，其實篇原文係金融、貿易同航運呢六隻字後，仲有「等等」呢兩個字，所以唔應該咁樣解讀！
佢又話，內地今年可以開放第五航權畀香港，國泰航空又可以直飛上海，呢樣相信對香港嘅航公司好有利啦！
李華華
讀者如有任何意見或報料，歡迎發送電郵至[email protected]。