上個禮拜四上畫嘅電影《極地雪犬》（EightBelow）票房走勢好凌厲，上咗四日共收得五百三十六萬，單係前日（周日）就收咗一百三十萬。呢部戲係講三個科學家帶住八隻雪橇狗去南極探險，點知遇上天災，科學家迫住要丟低雪橇狗逃命，後尾獲救後，佢哋唔忍心丟低啲狗仔，所以就搵埋拯救隊一齊再返南極。
千嬅瞓身值千萬
同樣係講人狗情嘅電影《導盲犬小Ｑ》喺香港上映時，票房一樣好掂，證明咗以狗為題材嘅電影喺香港幾有市場。而《極》片收得，主要係因為部戲拍得好感人，特別係其中兩隻狗死嗰幕，馮仁昭喺戲院度都見到唔少觀眾用紙巾抹眼淚。
至於楊千嬅同任賢齊主演嘅《天生一對》，上咗十八日，截至前日票房約收九百六十七萬，估計埋單應該有一千萬，千嬅今次瞓身性感演出都算冇嘥料。而李安部《斷背山》（BrokebackMountain）攞咗奧斯卡後，票房係咁升，上咗二十五日終於收咗過千萬。