港股再衝16000大關，恒指收15929，升128點，成交唔多，只有283億元。萬六關有壓力，就算一兩日內升得破，恐怕後繼亦會乏力，最理想係在關前再作整固，凝聚足夠動力，才一舉破位而上。
大市上升層面好明顯已擴散，個別有消息同有莊家嘅股份，有啲已大幅上升，有啲亦開始熱身，只要大市打橫行，唔大跌，未來一兩個月，仲係炒家世界。
南海控股（680）在6.5仙水平整固3日後，噚日又再發力，高收7仙，成交更大增到6.6億股，照度上去，短線目標係8.6仙。
內地地產股呢輪輪流發力，南海兩年前轉型主攻內地地產，股價上升，唔係亁炒，有基本因素支持。南海在深圳同廣州花都擁有兩個龐大發展項目，今年開始進入收成期，由於項目係於早年買入，盈利會好可觀。
地產投資進入收成期
位於深圳蛇口的樓盤半島城邦，上月發售第1期，1012個單位，5日內全部售罄，樓面面積合共14.5萬平方米，平均每平方米售價1.1萬元人民幣，公司套現16億元人民幣，估計毛利率約40至50%。
半島城邦Project好大，合共5期有7000個單位，樓面100萬平方米，公司佔第1期60%權益，第2至第5期則全資擁有。第1期今年8月完成，06年（12月結）可入賬，其他4期未來3年陸續完工。
廣州花都項目「晒士」亦好大，佔地62萬方米，總建築面積108萬方米，可居住2.6萬人，今年第3季開始動工，分數期完成，明年下半年開售第1期，提供售樓收益。
未來幾年，南海盈利可逐年上升，1年賺幾億元，PE只係單位數，有條件看好。睇番周線圖走勢，由05年1月開始，南海形成一個大圓底，係典型嘅收集形態，低位2.6仙，高位6.3仙，今次破位而上，量度上升目標剛好齊頭1元。
唯冠（334）仲要調整，成交則縮到只得706萬股（上周大升之日係3200多萬股），若成交再縮，調整隨時完成，升破1.80元就可追進，目標2.15元。
郭兆誠