華懋嘅樓盤，一直都係採唔憂賣嘅態度，好似青山公路豪景花園咁，入伙十幾年，發展商仲有貨賣。
不過，近年華懋都識得同個盤搞吓包裝，翻新吓啲外牆同換咁啲設施，仲起埋個現樓示範單位畀客睇。唔好話呢啲招數冇用，真係有客受落㗎。
過去周末，豪景花園有兩個一手單位賣出，其中一個仲係示範單位㖭。呢個設喺第二十五座凱旋閣低層A室嘅示範單位，面積一千八百八十三方呎，畀個九龍區換樓客睇中，覺得景觀好正，所以同發展商斟掂買嚟自住，成交價五百七十萬，呎價三千零二十七。「人靠衣裝，佛靠金裝」呢句說話真係冇錯。講番豪景花園（包括由幾幢低座住宅組成嘅第十五座依麗小築）一手貨，今個月已經賣咗五伙，中原地產分區經理譚榮輝話，噚日錄得一宗依麗小築成交，係A座低層二室，千三呎，成交價三百三十二萬，呎價二千六。