回復單身的翁紅，現時在上海綵排舞台劇，日前她被拍到與助手一起到書店買書和到藥房買保健食品。剛離婚的她表示婚姻失敗對她造成很大傷害，幸得親友支持，並寄情工作，才得以度過難關。 上海直擊
翁紅○三年底嫁給在美國賭場任職高層的伍偉傑，但這段婚姻只維持了兩年便告終，原因是男方不滿她在娛樂圈工作。近日忙於在上海綵排舞台劇《榆樹下的欲望》的翁紅，日前被發現在助手的陪同下，到了復興中路的新華書店買書，然後又去了藥房買藥。
名師教發音
記者事後致電翁紅，她說：「我不嬲鍾意睇書，呢排時間多咗，更加要自我增值，了解多啲舞台劇嘅嘢，我去藥房係買健康食品同埋保護聲線嘅藥，做舞台劇把聲好緊要，而我嘅聲線不嬲好弱，所以要保養吓。最近上海戲劇學院嘅賈幻真做咗我老師，佢主要教我聲線運用同埋發音，今次舞台劇係全國語，對我嚟講係好大嘅挑戰。」
婚姻留陰影
翁紅直認婚姻失敗是一個重創，她說：「所發生嘅事情，令我受咗好大嘅傷害，好彩有屋企人同朋友嘅支持，陪我度過呢個難關，我會全心工作，其他嘢唔諗咁多。」
問翁紅以後會否對婚姻產生恐懼，她說：「陰影一定會有，經歷咗咁大件事，我對感情有咗新嘅理解同定位，唔能夠遺忘，只能淡忘，但我會盡量調節自己嘅心情，否則對下一段感情唔公平。現階段我只會諗工作，心情要幾耐先可以真正平復，我都答唔到你，女人唔同男人，有啲男人可以唔理好醜搵一個人填補咗先，我唔得，我係寧缺勿濫嘅。」
採訪：盧健
攝影：娛樂突發組
