講咗都成年嘅now財經新聞台今日正式啟播，平時連公司業績都唔蒲頭嘅二少李澤楷，今早就會出現；而行政長官曾蔭權亦答應去會展幫佢做榮譽嘉賓主禮；咁又係，曾鈺成開辦事處特首都拉隊去擦鞋，二少開台，又點可以唔畀面？不過，特首嚟唔嚟大家其實唔係好關心，Rachel嚟唔嚟至緊要呢。
衛視一仗揚名立萬之後，睇嚟阿二少對做電視真係情有獨鍾，但佢唔係乜嘢電視都鍾意，你睇吓之前now寬頻電視開台、攞咗Discovery同衛視中英文電影頻道，佢都一於懶理就知啦。第日佢做文字傳媒嗰陣，又會唔會咁投入呢？
講番個台，財經台會用now寬頻電視第333台，幾似老豆啲「生意」咁33聲，你一個3我就3個。咁佢有咩節目可以省招牌？當然有啦，由今日開始一連三個星期會推出特備節目「精英專訪」，搵齊本港政商界精英分子，為香港未來經濟發展把脈。第一集嘉賓就係財政司司長唐英年；而行政會議成員兼馬會主席夏佳理今晚8點鐘亦會亮相，接受李鵬飛訪問。以二少地位，乜司長乜主席都請得郁啦！