公主黨李小琳做事果然明快決斷，佢上個禮拜五至話，只要港府能夠喺3月底前，批准中電國際同慧峰集團（8228）合營嘅中港電力發展向香港供電嘅申請，就有信心上半年開始正式向沙頭角供第一期電；佢呢頭話音剛落，嗰頭就登報紙賣全版廣告請人，一請仲請17個咁多，你話係唔係好有誠意呢。
華華睇吓請人嘅職位名單，範圍都幾廣泛，由工程經理、營運經理、公關、首席會計師、業務策劃經理、人事部經理、系統控制經理等等，甚至乎秘書同埋司機都請，有興趣投靠呢位爽快型公主嘅，可以畀封信或Ｅ貓去試吓，之不過，假如政府唔批佢哋供電呢，咁就……