馬時亨又有嘢搞。有九個省同港澳兩個特別行政區參加，簡稱「9+2」嘅泛珠三角金融論壇，禮拜四（3月23日）喺國際博覽館舉行。今次係由馬仔打骰嘅財庫局做搞手，煲呔梗識攝吓位打頭陣主持開幕啦，其他專題講者就有做咗外父冇耐嘅金管局總裁任志剛、中信泰富董事總經理兼行會成員范鴻齡、港交所主席李業廣、總裁周文耀、花旗大班陳子政等等，可以講係份量十足。
9+2論壇招呼貴客
個論壇今次嘅主題係「香港作為內地的國際融資及投資平台」，預計會有三百個內地九省區嘅官員同企業代表參與，咁多達官商賈到場，聽聞馬仔都好緊張，下令全局總動員去籌備，以免得失貴客。至於煲呔，佢做緊掃街大隊長之時，已經知道省市領導唔可以得罪，於是頻頻北上巴結，等佢哋向阿爺講好話。終於等到老董落台自己當家作主，咁好機會，當然要一盡地主之誼啦。
咁乜嘢係9+2？咪就係福建、江西、湖南、廣東、廣西、海南、四川、貴州、雲南九個省（區），以及香港、澳門兩個特別行政區囉；簡稱9+2，或者叫泛珠三角區域，以前有人倡議珠三角對抗長三角，後來又威啲，搞大珠三角；講講吓講到泛珠三角，包括九個省，不過都係口水活動，乜嘢「融資及投資平台」都係次要，社交平台就真。
九鐵風波繼續精采
咁馬局長當然要做戲做全套，今日佢老哥就會上港台周融個節目開咪，全力推介呢隻「珠」，咁八方亦打算早睡早起，上廣播道捧吓局長場，不過唔係關心9+2，而係關心九鐵。
九鐵風波表面平息，實情內裏繼續鬥爭，好似班簽咗名嘅高層，今後點算呢？係自己起身定等人郁呢？會唔會放計時炸彈呢？傳媒當然好想知。馬仔係政府派入管理局嘅兩個成員之一，一直未講過嘢，以佢嘅性格，應該可以有啲料爆，冇冬冬咁行貨。
八方聽聞，馬仔認為九鐵兵變都有正面意義，因為政府話兩鐵合併，最大阻力非在鐵路公司，而在立法會，所以今次事件對立會或有壓力，冇咁多阻撓。另外，主張炒咗兵變雙黎者，係管理局內非官方成員喎。係真唔係，大家可以今日向局長求證，順便問一問係邊個咁叻，搞到得番田二少呢個少爺仔？
爆料熱線：29290000、27860099
報料傳真：26239278
報料電郵：[email protected]