近年汽車零件股受芬佬歡迎，無論北泰（2339）或敏實（425），股價累積升幅驚人，兼且不時獲得證券行推介。
經紀黃話，其實有間喺大陸做汽車售後服務的新焦點（360），股價自今年1月以來節節上升，不斷創出新高，只係成交實在稀疏，不為外界留意。聽聞有芬佬見過公司管理層，覺得投資概念吸引，正密密在市場收緊貨。
貨疏買賣難
新焦點於去年年初上市，主要業務係賣汽車零件同埋提供汽車美容服務，分店數目發展極快，去年上市時只得39間，但家陣自家經營同埋加盟店，數目已超過200間，而公司話會繼續大力擴展。
其實新焦點亦算係大陸消費概念股，係呢期芬佬嘅熱門之選，所以獲睇起並唔出奇。
新焦點上周五升6.98％，收2.30元，再創上市新高，但可惜成交極疏，只得22.4萬股，真係唔知芬佬幾時先至買得齊。
慕容小初