美股連升4日，創01年5月以來新高。恒指上周升356點，收15801。上月27日，恒指最高15999，尚欠1點就係萬六。港股萬六，久違咗差不多5年，上次萬六係01年2月嘅事。
唔使好耐，可能只係一兩星期，恒指將一舉而破萬六。指數要破關，重磅股必然先有運行，即係滙控（005）同中移動（941）有運行。
滙控C輪9607：滙控上周五喺ADR市場收86.64美元，當地升0.95美元，折合港價134.42元，較上周五高出1.22元。
滙控以低PE取勝，歐美基金比本港股民更有信心，港價遲早殺番上去。
搵滙控C輪落手，始終係近日推介嘅9607最吼得過。上周滙控升0.70元，隻輪跌2仙，買佢更加着數。9607喺5月尾夠鐘，負溢價0.6%，槓桿率38.1倍（有效23.3倍），引伸波幅11.2%。
中移動C輪4959：中移動盤數靚，上周五升0.65元，收38.25元。ADR收市折合港價38.32元。
中移動未升得夠，買C輪，揀4959，隻輪上周五只升得1.5仙，收36仙。4959喺9月中到期，溢價8.4%，槓桿率10.6倍（有效5.9倍），引伸波幅34.1%。由於溢價唔平，做嘢較宜短線。
章盛