香港報紙/電子傳媒報道新聞有一個特點，就係好多事情都問學者意見；學者係乜人？就係在大學或大學單位教書或工作嘅人士，佢哋識得乜嘢呢？當然係自己嗰科啦，譬如關於傳染病就問公共衞生專家，有世貿問題就問國際經濟/貿易專家，有上市公司財務報告問題就問財務學教授等等……
但香港報紙上見得最多嘅學者名字，來來去去三幾個，似足「包教曉」（二十幾年前《明報》有包教曉信箱，無所不答），啲學者有問必答，唔到你唔服。其實一段報道之中，加插甚麼學者意見，是否真會提高讀者興趣？是否真的表示記者夠勤力，去搵出獨立第三者意見？還是記者懶惰，隨便搵一個學者噏幾句，有聞必錄嚟湊滿張稿紙？
好似最近九鐵單風波，唔少學者講嘢，佢哋連九鐵行政主管去中環陳情，講成等於捨公司正事不顧而去做無謂嘢，真正係紙上談兵，根本未曾喺現實商業世界做過事，講得多，盞自暴其短。
記得國寶級學者饒宗頤講過，追求學問，做研究，要抱有一種不怕孤獨嘅精神；真正學者平時做研究，專注於自己專科，不尚交際應酬飯局，有記者訪問，如果唔係自己真係研究開或研究過嘅，一定唔答，邊度肯做包教曉㗎？做即食麵專家，於學者面子有損，雖然增加知名度，但對學術地位，寫學術論文，有冇增益呢？左丁山就話冇咯！
好多年前，報紙唔興搵學者畀意見。直至某年，某教授半推半就，半自動獻身，對記者乜都評論一番，連自己冇研究嘅經濟時事都講一大餐，於是大名隔日見報，出咗名，變成登龍有術。登龍之後，現在報紙已經好少見到佢個名，除非上北京撞到佢出席會議啦，呢位教授可說開創先河，但後來者嘅青雲路就冇咁直線向上咯。