上星期可以話係香港機壇大日子，事關等到頸都長嘅行版XBOX360終於推出，今次香港Mic記隆重其事，搞咗個午夜首賣會外，仲特別喺沙田巿中心放咗大量試玩台供玩家試玩，當中最吸引機迷試玩肯定係重頭戲《NINETY-NINENIGHTS》（N3），事關試玩僅此一日，之後就運返日本，蘇州過後就要等到四月啦！
記者、攝影：許福合
作為新一代遊戲機，機能當然要超越現時對手，不過純粹講Config，講規格，對遊戲機意義不大，當睇到N3現場所造出來畫面，效果之震撼，比《真．三國無雙》系列高幾班，相信各位都會認同N3所表現嘅畫面，實是目前主機前所未見。
敵人多到淹沒自己
今次喺新城市內Demo嘅《N3》，雖非完全版，不過已係最新試玩版，與筆者之前喺E3見到嘅已經唔同，內容亦比較長。一開始可能怕玩家唔識玩，會列出手掣上按鈕功能，而開始時無咗一般遊戲極長嘅CG動畫，基本上一開波就要拼搏，而且完全無畀玩家熱身，就有一堆敵人衝過來！起初還可用一般斬殺技能應付，不過再來就係殺之不盡嘅敵人，留意右下角，唔使幾分鐘就已經有幾百次擊殺，雖然E3宣傳時曾提到每個敵人都有獨立AI，不過相信無邊個玩家可以有時間留意呢個特點！玩落去仲誇張，愈來愈多敵人，曾經試過被大量敵人卡住連走都走唔到，甚至人多到連自己角色都見唔到，起初筆者要經常跳起以「搵番自己」，其後發現只要將視點由水平推高，角色就唔會咁易埋沒喺人堆之中，操作上就比較容易。
一招破百靠必殺
有咁多敵人當然唔可以靠把刀一個個擊殺，遊戲內使用咗類似《鬼武者》系統，當擊殺敵人後，會有紅魂出現，收集足夠後就可使出必殺技！經筆者於戰場測試過，即使畫面塞滿敵人，使出一招仍然足夠殺清8成左右嘅敵人！剩下再招呼亦簡單得多。現場所玩到試玩版暫時只能用到女角，不過出招時畫面都非常型仔，而且威力驚人，淨係睇畫面都已經值回票價！
鏡頭以外
等了又等，終於可在港親身試玩呢隻《N3》。本來諗住慢慢試慢慢玩，令到份試玩報告詳細啲，可惜係試玩版只限今天亮相，翌日就要運返日本，起碼要等到四月中隻Game差不多推出時，才有機會玩到，所以今篇稿實在相當急趕之餘，仲要同一大班機迷逼喺新城市度，真係幾辛苦㗎！
PROFILE
遊戲類型：動作
對應機種：XBOX360
遊玩人數：1人
開發商：QEntertainment
推出日期：4月20日
