向來喺學術成績上鬥個你死我活嘅港大同中大，兩大高層噚日仲鬥到落球場㖭。雖然呢次兩大校長足球賽只係友誼波性質，上年曾經守龍門時搞到腳抽筋嘅港大校長徐立之，喺主場港大何鴻燊體育中心決戰中大，當然唔想失威。佢噚日同港大理學院副院長陳龍生最早到場，練習魚躍撲球同狂做熱身，賽事未開始，徐校長已因太盡力練撲波，整到件球衣污糟晒。
講開徐校長嘅龍門裝束，佢就特別戴上由加拿大帶返嚟嘅勝利護眼罩同護膝等，安全措施做到足。反觀敵方任前鋒嘅中大副校長楊綱凱就簡單好多喇，楊副校長只係着番件藍色隊衣，冇特別戴上護膝。
結果係點？上半場，由於中大嘅攻勢較為猛烈，搞到徐校長左撲右撲，十七分鐘就失守，俾中大先𡁻一球。好彩經一輪激戰後，兩大最終各入兩球，完成咗呢場友誼賽，徐校長同楊副校長都好開心咁攞到金牌，冇贏冇輸，開心和氣收場。
爆料熱線：29290000、27860099
報料傳真：26239278
報料電郵：[email protected]