吳卓羲及王秀琳等昨日穿上由大學生設計的環保服裝行catwalk，以王秀琳的錫紙露臍裝最為搶鏡。早前吳卓羲出席活動時忘記拉褲鏈，故他今次做模特兒特別檢查清楚。
吳卓羲（Ron）、王秀琳（Mango）及陳小韻等昨日出席在大埔舉行的「創意新衫型聚大埔超級城」活動，各人都穿上由大學生設計的環保服裝行catwalk，以王秀琳的錫紙裝最為搶鏡，露出了小蠻腰及一雙美腿，而阿Ron亦不讓女士專美，真空穿上一件紅色西裝外套，隱約露出胸毛，引死台下的歌迷。
寧願斷背山
早前阿Ron出席活動時忘記拉褲鏈，成為笑柄，昨日他已謹慎不少，但他不諱言仍有陰影，阿Ron說：「我出場前都睇得好清楚拉咗拉鏈未，同埋我身邊嘅人會特別留意，提醒我。」
談到最近他有不少是非，其老友林峯又被指在內地拍劇包女，阿Ron謂：「係囉！其實嗰個係林峯嘅助手，呢個助手仲有個孖生妹妹，我喺大陸拍劇嘅時候都叫過個妹妹幫我手。請女助手又會傳緋聞，請個男嘅又話你斷背山，真係冇辦法，不過我寧願傳斷背山都好過傳緋聞。」
此外，Mango來到現場才知服裝如此性感，連打底褲也沒有預備，她說：「所以我坐嘅時候都要好小心，由於條裙係錫紙，一坐低啲錫紙就拮到我大髀。」
發圍靠自己
最近有傳蕭定一打本給李彩華做生意，同是蕭定一旗下藝人的Mango說：「我同老闆都唔熟，而且我又唔係一姐，都係靠自己啦！」
採訪：胡比 攝影：仇志德
