港股向好，恒指重上15800，短期試衝16000大關。今時今日港股已好明顯係進入炒股市（係炒股、唔係炒市），藍籌好大程度只係用作造期指嘅工具，二三線股同國企好多都起到「巴巴聲」，升幅以倍計，未來的兩三個月，炒股將大行其道，搵大錢亦係此時矣。
中油潔能（260）做「披成」，只係畀咗兩個大芬，冇出街，雖然「披成」價只係0.52元，但股價仍然係扶搖直上，上周五去到0.64元，聽聞係兩個大芬未夠喉，繼續在市場搶貨。仲有消息，就係有幾個基金仲傾緊求貨，如果做埋呢單deal，以後中油潔能由基金「睇場」，股價仲有排上。
聽中資線報料，中石化（386）私有化旗下子公司嘅步伐會比預期為快，而香港嘅上海石化（338）同儀征化纖（1033），會好快擺上日程。上禮拜，已有人收到風，兩股繼續造好，聽講上石化私有化個價在5元過外，而儀征則會係3字頭。
儀征現價有值博率
計值博率，儀征有逾40%，無論短炒同中線（兩三個月），都制得過，短線睇2.50元，中線就等佢宣布。
唯冠國際（334）盤數好靚，宣布後股價應聲彈起，跟住整固兩日，上周五高收，相信調整好快完成，下一個浪，上升目標指向2.15元。
唔係好耐，只係去年10月，唯冠股價被踩到跌穿0.50元，但好在翻身得快，家吓已升番兩倍有多，唔少大行又要對佢另眼相看，有一份最新嘅報告，目標價已係2.30元。
講番盤數，06年度（6月年結）中期營業額84億元，升42%；盈利1.07億元，升73%；每股盈利16.61仙，升72%；派中期息2.5仙，由於生產規模擴大、效益增強，以及成本控制措施收效，期內毛利率由7.43%改善至7.55%，而純利率則由1.05%改善到1.28%。
唯冠同台灣主要面板製造商ChiMeiCorporation建立夥伴關係，未來業績會有更強勁增長。06年度盈利料約1.8億元，07年度可升至2.3億元，每股盈利0.356元，預測PE7倍計，股價已可見2.50元。
郭兆誠