個市好咗，員工流失量又高番，想搵個合適員工，真係唔係咁易，唔好講話中小企難請人，就連滙豐呢啲大企業，都要出到獎金搶人，大家就知人才係幾咁難求啦！
據華華所知，滙豐工商業務部早排喺內部發咗通告，話現有員工若果成功介紹新同事入職，成為該部門嘅保險銷售主任或經理，當新人做滿一年後，介紹嘅員工就會有萬二蚊介紹費收（分兩期發放）；唔識人做保險都唔緊要，成功轉介朋友入職做客戶關係經理，新人又做夠一年嘅話，都可以有8千蚊獎金。
滙豐話，工商業務保險個Team舊年八九月成立，要成70人，但請來請去都唔夠人，咁咪出動獎金囉！據聞家吓保險部仲有七個Quota，想攞獎金或者轉新工，就行快步啦！
出錢搶人呢招，喺人才難留嘅會計業一早就用緊，而且成效唔錯，有啲人真係介紹費都等於幾個月人工，都咪話唔和味！華華就覺得，有錢好辦事，一來員工會落力啲去搵身邊嘅朋友，二來為咗筆獎金，介紹人點都會盡「力」留住新人，而做新人嘅，就算份工唔係100%啱心水，礙於人情，都唔會話走就走囉！
李華華
讀者如有任何意見或報料，歡迎發送電郵至[email protected]。