官恩娜（Ella）童年時有個趣致的別名，叫「官駁士」，因為當時媽媽較疼錫哥哥，每次兩兄妹打架，媽媽只會責罵Ella，小Ella經常駁嘴，其母便為她改了這個別名。Ella出生後，經常遭哥哥「偷襲」打頭，難怪她學會說的第一句話是：哥哥打我！
官恩娜有一兄一妹，但她深得父親寵愛，連家族經營的珠寶店「恩娜珠寶」也以她的名字命名。不過Ella謂小時候母親較疼錫哥哥，兩兄妹偏偏常常打架，結果每次遭母親怪責的都是她。
母親偏愛長子
Ella說：「我同哥哥細個打到黐肺，媽咪好偏心哥哥，就算哥哥做錯，媽咪都只會係咁意鬧佢幾句，但對我就好惡咁鬧，記得細個嗰陣媽咪叫我做『官駁士』，話我成日駁嘴喎！」兄妹狗咬狗骨其實有原因，話說Ella出生時，才一歲的哥哥不懂事，一有機會就「偷襲」妹妹，Ella笑說：「我第一句識講嘅說話，就係：『哥哥打我頭頭！』」
談到童年最深刻的回憶，Ella表示莫過於愛犬毛毛勇救兄長，她說：「六、七歲嗰陣，我哋住喺好偏僻嘅村屋，有日屋企養開嗰隻唐狗突然失蹤，幾個禮拜之後，隻唐狗就帶住幾隻狗仔返嚟，其中一隻就係毛毛，其餘啲狗仔送晒畀人。毛毛好錫哥哥，有次哥哥俾附近一隻惡狗咬patpat，咬完仲要追住再咬，毛毛即刻衝出嚟救哥哥，趕隻惡狗離開，好似義犬報恩嗰啲場面咁。」
愛犬不辭而別
遺憾的是，毛毛有天突然不辭而別，Ella說：「好多年之後，毛毛突然唔見咗，再冇返嚟。我聽人講有靈性嘅狗唔會死喺主人屋企，所以毛毛應該係知道自己老，就嚟唔得，所以靜靜離開。毛毛嘅事，我同哥哥永遠都唔會忘記，原來咁多年嚟我都冇同毛毛合照，覺得好遺憾。」
採訪：戴彩煥
部份圖片提供：官恩娜
