吳彥祖（Daniel）同梁詠琪噚日一早就去咗西貢，幫世界自然基金會一個遠足比賽做開步嘉賓。Alive四子Daniel同陳子聰、連凱、尹子維最近傳不和，Daniel爆粗鬧尹子維嘅片斷仲人人都睇得到。
暗示拆夥
Daniel就話因為呢件事都有少少唔開心，佢仲話要好好休息，考慮吓係咪要繼續落去。對於有人話佢哋成日都靠是非引人注意，Daniel回應話：「今次我哋俾人知道咁多嘢係唔好彩，之前喺網上同Terrence（尹子維）咁你一言我一語都唔應該，我哋應該私下討論。」
不過馮仁昭就覺得係宣傳，因為遲吓佢哋有部戲要上，所以四個就夾計，度咗呢條橋。但係佢哋太唔小心喇，做戲都做全套啦！報紙登晒佢哋唔啱嘅消息出嚟之後，馮仁昭個老友居然喺一間食肆度，見到Daniel同尹子維一齊食飯。而前晚尹子維去上海，仲同埋Daniel女友LisaS.一齊出席萬寶龍嘅派對。唔怪得尹子維喺上海對住記者話，會同Daniel多啲溝通！鋪晒路和解，大家到時睇好戲啦！
