近期最多手機新聞嘅例子，首選必然係三星！除公布全球最高像素嘅拍攝手機B600，夠光宗耀祖外；「機場」Sales又再報料，佢話近3個月三星水貨不斷出，搞到一堆唔新唔舊嘅機如D600、E760等，都被迫欲拒還迎做冧價，少則平$200，多則減$500，總之唔理高階抑或低階，三星水機就一律冧！查實，自從香港三星試行咗套「以快打快」政策之後，P858已先贏一仗，與水機搞冧價有冇關就不得而知，但喺用家角度睇始終係好事。
記者、攝影：陳國輝
SED750i唔使兩千
唔單止三星，就連另一大牌子SE都要搞冧價求售！兩者唔同地方，SE淨係冧咗D750i以及W800i兩款人氣音樂手機，唔似三星成支軍隊咁一齊冧價；另一點，係SE水機冧價幅度更大，好似W800i咁，上個星期就由$2,880跌至得番$2,330；至於D750i跌得重勁，由之前嘅$2,580跌剩$1,880，冧足$700，唔使二千蚊就有得玩！據Sales解釋，可能係收到風W810i會喺今個星期殺到，所以舊貨都係時候割價求售。