FingercroxxXZooYork台灣音樂二人組撐硬

Fingercroxx夏季系列登場，是次計劃竟然涉及港、美、台、日4個單位。原來今夏品牌首次找來美國品牌ZooYorkCrossover，除出了以板仔為題的衫及帽外，仲首次推出滑板！宣傳方面則找來日籍攝影師Kabo操刀，拍攝台灣紅得滾熱辣嘅張震嶽及MCHotDog作宣傳照！另加插攝影展及張震嶽×MCHotDog來港出席PrivateParty造勢，音樂友潮友，埋位喇！

記者：許維雅
攝影：何家亮

板仔主題港美台日聯盟

四個不同嘅單位：本地品牌Fingercroxx、美國品牌ZooYork、日本攝影師Kabo、台灣歌手張震嶽及MCHotDog聚首一堂，起因就是宣傳Fingercroxx最新夏季系列。最初設計師Wallace決定今季靈感來自《Dogtown》，以板仔為今夏主題，更有意推出一塊滑板，於是索性聯想找一間適合板仔嘅品牌Crossover，好讓佢哋出板，Fingercroxx出衫，最後選擇咗ZooYork。到考慮宣傳計劃時，Wallace想拍攝一輯Styling相配合，於是想起了張震嶽，「我覺得Style很啱今個系列的形象，由於張震嶽是阿葛（葛民輝）介紹我認識的，於是便找來阿葛負責籌備今次展覽這輯相。並由他御用SnapStyle攝影師Kabo負責攝影。」

Kabo：飛台灣兩日完成任務

今次展品全是Kabo專程飛到台灣兩日為Fingercroxx×ZooYork拍攝宣傳照的作品，一日到張震嶽Studio影，一日在街頭影。雖然展品不多，但張張充滿味道，SnapShot變大作。

■這是Kabo自己最滿意嘅一幅，凌亂殘舊嘅背景，最有味道。

記者=記Kabo=K

記：第一次影相係幾時？你有冇讀過任何關於攝影嘅課程？
K：93年喺NewYork，有個朋友送咗部好簡單、冇閃光燈嘅相機畀我，我就開始對攝影有興趣，所以到𠵱家我都唔識用閃光燈。我其實冇讀過任何關於攝影嘅課程，我覺得只要日日影，就必然試到自己想要的作品。

記：你熟唔熟悉Fingercroxx這個牌子，有冇買過Fingercroxx嘅產品﹖
K：我同Wallace識咗好耐，我都好鍾意Fingercroxx，不過就冇買過，因為Wallace應承送畀我，我自己最鍾意今次Crossover件黑色Tee。

記：今次拍攝順唔順利？你之前識唔識張震嶽及MCHotDog？欣唔欣賞佢哋嘅音樂？
K：今次拍攝兩日都好開心，台灣人比較Open，仲容易影同捕捉佢哋嘅神態。但我之前唔識MCHotDog，第一次見，但已經發覺佢係一個好風趣嘅人，好好玩。我有聽過他們的CD，係佢哋送嘅，雖然跟日本音樂主流唔同，但我好喜歡。

Wallace：無啦啦執到金！

是次訪問，最好笑係原來Wallace構思時主力想搵張震嶽影相，根本唔知MCHotDog喺台灣咁紅。不過，後來輯相出來效果好好，MCHotDog亦好配合到FingercroxxImage，就立刻順勢力谷張震嶽同MCHotDog配合宣傳，Wallace自己都話好似無啦啦執到金咁。

■Wallace最喜歡的一幅作品已經用作雜誌廣告。

記者=記Wallace=W

記：今個Fingercroxx系列嘅靈感來自邊度？點解會有咁嘅設計構思？
W：我之前啱啱睇咗一套講街頭滑板嘅電影，所以想今個夏天做一系列滑板衫之餘，想做一塊真正嘅滑板。我自己比較鍾意ZooYork這個滑板牌子，佢哋街頭味較重，於是搵咗佢哋Crossover。我一直都覺得香港同紐約好似，係新潮、人種較多嘅城市，於是Printing上面就出現咗紐約同香港嘅街景。

記：點解會搵Kabo負責今次攝影？第一次收到相時感覺係點？
W：之前透過葛民輝認識張震嶽，所以今次輯相順便搵葛民輝做策劃。加上我同祥仔（doublepark美術設計）商量輯相時都想啲相有SnapShotFeel，所以Kabo好啱我哋。輯相正係我哋心目中想要嘅嘢。

記：你之前有冇聽開張震嶽及MCHotDog嘅音樂？
W：我一向有聽開張震嶽啲歌，而MCHotDog就係朋友送咗隻碟畀我聽，我覺得味道好似，但我偏向鍾意張震嶽多啲。

展覽作品

展出的全是簡單的SnapShot，Kabo話佢影相全憑感覺冇特別技巧，但就是不簡單。