𠵱家發展商搞商場壓力愈嚟愈大,要不斷諗計至可以吸引到消費者嚟幫襯,新地嘅大埔超級城計劃轉型,以年輕人同年輕家庭為對象。
個場會加入燈光同富現代感嘅設計。耗資四千萬嘅B區外牆翻新會喺月底展開,明年首季完工。C區會引入特色食肆;A區則加入年輕人潮流品牌店舖。
噚日商場又搞活動,宣揚環保意識。佢哋一直有搞唔少呢類活動,好似為商戶提供回收廢紙、膠樽同鋁罐服務等。唔怪得商場今年初攞到環保署頒發嘅「明智減廢」標誌啦。
新地代理租務總經理馮秀炎透露,商場呎租七十至一百八十蚊,續約租金有雙位數字升幅,新租就升兩至五成;預期今年收租增長會高過舊年嘅一成七。
電郵地址:[email protected]