做小股東人微言輕，息就有份收（如果有），但冇得話事，仲要睇管理層生唔生性，有時即使有得賺都未必有息派，最多係喺股東會度，好好醜醜食一餐。但世事冇絕對，好似舊年12月上市嘅雅居樂地產，專登為股東搞咗幾個廉價中山團，等班股東玩吓食吓，順道參觀中山業務，喺上市公司嚟講，都算係少數囉！
據華華所知，每個股東可以帶三個親友同行，每位138元，包來回船飛同一餐自助午餐，朝八點幾出發，晚六點返到香港，玩足一日，有乜景點同玩乜？話到明係視察業務，就梗係要去佢哋旗下嘅新盤同示範單位，想買手信或者Shopping就未必夠時間。
單係來回船飛都已經三百幾蚊，家吓半價仲包埋食，又真係幾吸引；之不過，一個唔覺意又睇中三兩個單位嘅話，就真係唔知邊個着數啲囉！