劉嘉玲同梁朝偉愛情長跑十六年，一段情要維繫咁長時間當然唔容易，點樣箍實男友，嘉玲就梗係有計，佢除咗不時同偉仔拍拖去外地旅行外，平日又會買吓小禮物𠱁對方開心，增添情趣。
鍾情簡單款式
好似早幾日下晝五點零鐘，至愛夜生活嘅嘉玲都好似未瞓醒咁，臉青口唇白就走出屋企門口，同助手、一位女士去中環Prada逛街，嘉玲殺入名店嘅首要任務就係先為偉仔置裝，跟住至輪到自己揀衫，幾有偉仔心呀！
當日嘉玲先入男裝部，精心挑選咗一件簡約款式嘅米白色男裝上衣，睇佢個樣就似乎好滿意喇，望住件衫都忍唔住笑，唔使問梗係送畀偉仔喇。
之後嘉玲再去女裝部入貨，佢揀衫都幾仔細，真係啱自己心水至會買，而嘉玲對素色、簡單款嘅新貨較有興趣，但其間有保安員通水有記者在場，嘉玲即刻擰歪面戴番副黑超，以免殘樣上鏡，而結果嘉玲最後就買咗一件黑色連身裙。
嘉玲前後喺店入面逗留四十五分鐘左右，開開心心挽住兩大袋戰利品離場，但唔知幾時至可以見到佢同偉仔着住Prada黑白配一同出現呢？
Textby關仁
