三四十年代是上海時代曲的黃金時期，龔秋霞、白虹、周璇、姚莉、李香蘭、白光和吳鶯音並列七大歌手。姚莉當年由周璇和其夫嚴華提攜入行，四十年代兩人已平起平坐。對於周璇這位大恩人，姚莉說：「我永遠都唔會忘記。」談到好友李香蘭，姚莉不勝欷歔，兩人近年先後喪夫，分隔港日兩地，姚莉歎道：「希望有緣嘅話，佢會嚟香港見吓啦！」 撰文：戴彩煥
姚莉，原名姚秀雲，小時候已是周璇的超級歌迷，經常一邊聽偶像的歌，一邊模仿其唱腔。
初見偶像 備受賞識
姚莉說：「十四歲嗰年（1936年）我喺上海華興電台做播音，唱緊周璇嘅歌，咁啱周璇同佢先生嚴華去電台做慈善節目，周璇聽見我唱佢嘅歌，問我有冇跟老師學過？當時我緊張到聲都震埋，答佢話：『冇呀，你咪係我老師囉！』跟住嚴華就引薦我簽百代，後來佢寫咗隻《賣相思》畀我唱，結果一唱就紅咗。」
姚莉於四十年代已跟周璇平起平坐，當時周璇被喻為「金嗓子」，她則被封「銀嗓子」。之後姚莉憑《玫瑰玫瑰我愛你》、《得不到的愛情》及《春風吻上我的臉》等名曲再上層樓。周璇本是百代大姐大，被姚莉後來居上，會否有點不是味兒？姚莉笑道：「嚴華同我講，話：『佢（指周璇）有少少妒忌，佢個心冇咁寬大。』雖然周璇份人幾cool，好多時鍾意自己一個人，但在我嚟講佢同嚴華都係我恩人，我永遠唔會忘記。」
先後喪夫 姊妹情深
六五年退休後，姚莉仍跟不少前輩歌手保持聯絡，李香蘭（即山口淑子）便是其中之一。談到這位好友，姚莉感慨萬分，她說：「我哥哥姚敏（名作曲家）生前寫過好多好歌畀李香蘭，李香蘭好欣賞我哥哥，佢話雖然出過咁多唱片，但最喜歡都係哥哥寫嘅歌。哥哥過身之後，有次佢嚟香港兩日，叫我陪佢，嗰陣時佢已經係日本國會參議院議員，所以嚟香港都好低調。」
姚莉續說：「嗰次佢叫我帶佢去哥哥生前同佢去過嘅地方，又喺半島酒店一邊傾偈、一邊唱哥哥嘅歌。幾個月前我哋通電話，知道佢先生早幾年過咗身，我話我先生前年都走咗，大家同一命運！我真係好掛住佢，本來叫佢得閒嚟香港見吓，佢話老喇，邊度都唔想去，叫我不如去日本探佢，但早排我隻腳開完刀，行動唔方便，希望有緣嘅話佢會嚟香港見吓啦！」?部份圖片及資料提供：姚莉、陳永業
