香港人做任何事都講風氣，就連養狗品種的選擇都會隨時間而改變。好似近幾年才剛剛興起的雪橇犬，其實並非太適合在香港飼養，但香港人一於有理冇理照養可也。好似今次主角Cyclone同Zephry亦是在Yanne全無養狗經驗之下帶回家做屋企一分子，但牠們並不是一般在街上所見的雪橇，而是無論價錢同品種都十分矜貴的阿拉斯加雪橇好兄弟，幸好Yanne都照顧得牠們靚仔又精靈。
記者：許維雅 攝影：陳智良
八犬齊上
現正上畫中的電影《極地雪犬》，是以日本南極探險隊的真人真事改編，講述3名探險專家和8隻雪橇犬合作無間的感人故事。因為一場雪地災難令人狗分開，8隻雪橇犬要獨自在雪地裏掙扎求存。不過探險家為了一個人狗的承諾，不惜再勇闖險境拯救8位忠誠隊友。
查詢：www.disney.go.com/disneypictures/8below
唔忍心拆散好兄弟
4年前的Yanne從未養過狗，有次到狗舖見到牠們十分可愛，於是決定買雪橇犬回家養。Yanne：「當初諗住買一隻，但Cyclone同Zephry兩兄弟啱啱到香港一個禮拜，我唔捨得分開佢哋兩個，於是一口氣買了兩隻回家養。」最意外係Yanne買狗嘅時候，狗舖同Yanne講牠們是西伯利亞雪橇，點知愈養愈大隻，最後才發覺牠們是阿拉斯加雪橇犬！狗舖因而收平咗Yanne唔少。（皆因阿拉斯加雪橇的體形比西伯利亞雪橇大而強壯，品種亦較罕有，所以價錢貴好多。）
Cyclone（大佬）
年齡：4歲
特徵：由於較活躍同為食，身形比較大隻同健碩，下巴對下心口全白毛。
Zephry（細佬）
年齡：4歲
特徵：由於較文靜，所以較細粒，有黑毛圈住個頭，眼神較嗲，十分受女仔歡迎。
兩兄弟死穴：小提琴和電腦Printer，見到即走。
大佬照住細佬
大佬即是大佬，哥哥Cyclone比較活躍好動，出街玩就周圍衝周圍撞，但性格十分忠實，即使做錯事都直認不諱，細佬有事一定幫拖。相反細佬Zephry就比較文靜怕事，容易啲控制住喺主人身邊。佢有乜事都即刻匿埋喺阿哥後面，但性格就較蠱惑，咬Yanne啲鞋就收埋嚟咬，用手遮住扮冇嘢。Yanne話：「每次細佬百厭我打細佬，阿哥就會立刻衝過來咬住細佬背脊帶佢走，咁我就即刻唔忍心打佢哋。佢哋出街玩都好齊心，有乜事發生，阿哥都好照顧細佬。不過大佬就比較為食，所以教做動作比較易。」
唔可以畀自己冇時間
一向以來，養大狗比養小狗的心機要多出幾倍，何況養兩隻屬於較難打理的品種——雪橇犬。由於屬雪地品種嘅狗，春天必須要開抽濕機，夏天要長期開冷氣，加上牠們是力量型工作犬，更加要消耗牠們體力和教牠們，Yanne可謂費盡心機。Yanne：「我平時要返工，惟有放工就返屋企同佢哋玩，佢哋最鍾意咬公仔同玩波，不過阿哥試過將公仔吞咗落肚搞到要做手術，住咗5日醫院，所以平時我唔喺屋企都會收埋晒啲嘢。一星期會帶佢哋出去同其他狗交際一下，等佢哋用運動發洩精力，所以唔可以畀自己唔得閒。」
返學孖寶兄弟同心
Cyclone同Zephry都試過到訓練學校住了一個月，大嗱嗱用咗成萬元，心軟嘅Yanne冇要求學校教牠們做甚麼特定嘅動作，淨係要求牠們行路時唔好搶繩。Yanne：「住訓練學校時，我只可以每星期探佢哋一次。訓練員話畀我聽通常每次訓練都係逐隻教，但Cyclone同Zephry就死都唔肯分開，訓練員是但拖走其中一隻訓練，佢哋兩個就一齊吠，於是只好用兩個訓練員同時間一齊教，十分兄弟同心。」
起底
AlaskanMalamute阿拉斯加雪橇犬
原產地：美國
歷史：是世上最古老的犬種之一。大約三萬五千年前，中亞洲的人帶着牠們擁有胡狼形態的狗，遷徙到西伯利亞的盡頭地區與北極地帶。這些狗與北極狼相互交配之後，便發展出阿拉斯加雪橇。阿拉斯加雪橇世代都定居在阿拉斯加州的安維克河一帶，是馬勒苗族人的重要財產。
身高：58-71公分
體重：39-57公斤
頭部：頭蓋廣闊，鼻口部大，顎骨強而有力，臉形與狼相似。
口：大而突出的吻部，遠看有如微笑般的嘴唇。
眼：棕色，呈杏仁形。
耳：耳朵比例略小，兩耳之間的距離較闊，向上聳立。
身軀：體格強壯，胸部寬闊而深凹，背部十分平直。
四肢：前肢較粗，肌肉發達，奔跑時步大力雄。
毛：下毛如羊毛狀且厚實，厚而硬的上毛呈聳立狀。
特性：此犬忠實，各方面能力都比較強，是優秀的工作犬，亦是感情豐富的家庭犬，牠們可以為主人而犧牲。阿拉斯加雪橇以身強力壯及富忍耐力而聞名於世，馬拉繆特族對此品種評價極高。但牠們對陌生人十分友善，很難訓練牠們做看門狗。
