張曼玉（Maggie）前晚喺東京六本木嘅森藝術中心出現，原來王家衞御用照片攝影師夏永康喺呢度舉行個人攝影展，喺開展前一晚搞咗個開幕酒會，請晒佢啲演藝界好友出席，Maggie亦專程飛咗去日本撐場，日本女星松蒲亞彌都有到。原本大會亦有請藤原紀香同胡兵嚟開幕酒會，但佢哋只係送咗個花籃。個影展由噚晚開始至下個月十六號，都會開放畀外界參觀。
桂林巴黎取景
今次展覽除咗有好多王家衞電影嘅劇照，仲有之前夏永康專登去桂林同巴黎幫Maggie影嘅一輯相，不過前晚Maggie就冇乜欣賞自己啲相，反而最留意係故友張國榮（哥哥）嘅照片。好多年前，夏永康幫哥哥影咗一本寫真集，有部份相冇擺入寫真集入面，呢批珍貴照片從來冇曝過光，所以前晚展出時，Maggie睇咗呢批相好耐，而且流露出一臉惋惜㖭。
東京直擊
