藝人過去一周出位衣着逐個捉
周麗淇–百變絲巾
周麗淇：「本身公司有image同我襯衫，好多時都會有同事幫我搞掂晒，尤其係出席活動，雖然我都有唔少服飾贊助，但係我平日都會去街買衫，好似今日呢條絲巾皮帶，我就覺得好特別，除咗可以做絲巾放喺條頸外，亦都可以加個扣變成皮帶，我鍾意點襯就點襯，真係幾化算。」
薛凱琪–假污牛王
薛凱琪：「呢條牛仔褲係男裝款，不過我實在太鍾意，於是買咗返嚟改短着。條褲係屬於Levi's旗下Flu系列，特別之處係牛仔布表面，有好多膠質嘅印，點洗都唔甩，畀人一種整污糟咗嘅感覺。呢條牛仔褲係我喺日本旅行時買，嗰間舖頭好隱蔽，門外面完全冇Levi's字眼，但係裏面係賣唔同系列嘅Levi's，呢款褲喺香港係冇行貨賣，水貨就比我買嘅貴成八百蚊。」
鄧麗欣–超筍耳環
鄧麗欣：「雖然我有造型師揀衫，但係我好多時都會自己襯，因為自己好鍾意着一啲colourful嘅衫，所以自己揀就好啲。好似呢對喺泰國買嘅耳環，我未試過買到啲咁平嘅飾物，有次喺香港仲見到賣成百幾蚊，真係好抵，可以買到啲平嘢梗係開心啦，而且我平時去旅行都會捐窿捐罅去搵平嘢，有時仲會同人講價㖭。」
活己嵐–鎖匙承諾
Krusty的活己嵐：「我覺得鎖匙形嘅嘢，代表一個承諾，如果人哋拎住個鎖匙就好似打開到你個心。所以agnesb呢條頸鏈我就好鍾意。有次我同佢哋影完相，之後就送畀我，所以我成日戴住㗎！襯衫方面我最鍾意玩layer，兼且鍾意mix&match，今年我哋會打扮得女仔啲，所以就加多條裙喇！」
古巨基–潑墨型牛
古巨基：「我好鍾意Number（N）ine同Hare呢兩個牌子，今日呢條牛仔褲上面嘅潑墨好特別，因為啲墨唔係印上去嘅，所以每一條褲嘅圖案都獨一無二。Hare呢條鏈就好啱平時襯牛仔褲、T恤，有時襯少少飾物點綴吓會好睇啲。」
鄭伊健–簡約華衣
鄭伊健：「其實我都幾鍾意自己襯衫，見到靚嘢都會忍唔住買，仲收藏咗唔少飾物，好似襯今次個function，呢個look就係簡單而隆重，着衫最緊要係啱個場合，就以一條褲為例，每條褲個cutting都唔同，有啲係可以上台表演着，有啲就唔得。」
Kenny–保健鋼錶
關智斌（Kenny）：「我全身最特別係隻錶，係自己用錢買最貴嘅錶，我鍾意佢錶面夠大，個款都好靚，重有佢錶底有兩粒晶片，戴喺唔同人嘅手就會影響唔同嘅磁場，對健康有幫助喎。」
方力申–手帶日潮
方力申：「呢兩條Undercover手帶係我朋友去日本旅行買嚟送畀我，屬於今年最新款式，手帶一set五條，分別有黑、白、銀、藍同黃色，質地有啲似醫院用嘅病人手帶。𠵱家東京每逢推出新款或者限量版嘅產品，必定一兩日之內被掃清，所以呢款手帶都好搶手。」
採訪、攝影：駱華齡、胡苑君、黃君怡、馬建華、李珮洳、楊潔雯
