香港100Fun：唔去本州去長洲十幾蚊賞櫻

香港100Fun：唔去本州去長洲十幾蚊賞櫻

今個3月，有無打算飛去日本本州的東京、京都等睇櫻花？又或花十幾蚊搭船，近近哋入長洲，一樣都係花花世界！繼搶包山、學風帆之後，長洲近日掀起一陣櫻花熱，爭回唔少遊人嘅注意力。眼前所見既有拍友帶備鏡頭捕捉櫻花、杜鵑靚樣，亦有遊人搜購花花物品、嚐花茶……人在長洲，就如人在花叢中！

記者：趙善怡　攝影：楊錦文　Model：Kathy、Carie@Salvador

櫻花

杜鵑花

木棉花

蘭花

桃花

■漫步花叢中，心情頓感舒泰。

■白花羊蹄甲響路邊肆意盛放，十分搶眼。

十幾棵山櫻花　春日影餐飽

賞花之旅起點，係關公忠義亭。呢個地方唔難搵，出長洲碼頭向右行幾分鐘，再依照路牌指示，轉入內街向山上行約十分鐘就到。碼頭嘅熱鬧同亭園嘅清幽果真截然不同，而十幾棵從台灣引入嘅台灣山櫻，就種響關帝廟前，散發淡淡幽香！雖然，山櫻數量唔足以打造出一片宏偉壯觀嘅花海，但仍然吸引到一班影相發燒友帶齊長短鏡大顯身手！正所謂室雅何須大，花靚又何須多，所以小記身上即使只有輕便裝超小型數碼相機，都忍唔住影個痛快！

■除咗賞花，不妨入廟拜個神。

至HipHea地　中西合璧

經過一輪上山落山賞花後，大家都開始有啲攰，若果可以飲啖花茶，休息攤唞，就……眼前，竟然正有個好Hea嘅地方。小店老闆叫Ben，之前係做康樂管理、餐酒買賣，在長洲住咗5年後就心郁郁，兩三個月前終於開咗呢個地方，等人人可以好Hea咁歎吓咖啡、花茶，買吓酒。而且呢邊放件木傢俬，嗰邊擺件大梳化，大玩中西合璧。坐吓Hea吓，遠眺長洲海景，成個人都醒神晒！

■(前)清新早晨由薄荷、金盞花及馬鞭草打造，有助提神、清熱下火，售$25/壺。(後)味道帶少少酸嘅美白動人有助美白、滋潤肌膚，主要成份係玫瑰花及芙蓉花，售$25/壺。

德辰
地址：長洲大興堤路5號地下
電話：82088007
營業時間：2:00pm-1:00am（星期一休息）

■Ben搜羅各地餐酒、香檳、啤酒及威士忌，無論你想買走或坐響度飲，都咁歡迎。

■(左)汁燒雞肉串肉汁豐富，售$20/3串。(右)BBQ羊肉及牛肉串拼盤乾身惹味，售$30/6串。

■花形黃金蝦球伴飲至正，香口又味美，售$20/6粒。

鮮花處處　香氣大不同

小休之後，按指示沿着北帝廟方向，依海旁走。路經一列海鮮檔後，至排廠路休憩處，就可搵到木棉花、白花羊蹄甲……等蹤影。好有趣，花從來唔係長洲嘅賣點，但只要細心觀察及搜尋，卻發現處處有花！我哋感受到唔同嘅花香同清新氣息，有啲更帶有甜香……相信都係長洲人對花鍾愛嘅成果。

■賞花時，小心俾熟透嘅木棉花擲中！

天生購花狂　靚到上身

香港人去到世界每個角落旅行，都嚷着Shopping，今次話明係賞花之旅，當然都想買啲花花飾物，應應景。呢間開業約有3個月嘅小店售賣各式各樣日式糖果、零食及東南亞飾物及擺設，全部零食售價都不過二十蚊，專攻學生、妹妹仔市場；但講到吸引，都係眼前那些花花飾物，用嚟自用或送禮都咁啱！

■925純銀頸鏈印有多種簡約花花圖案，襯衫一流，售$80。

■925純銀花形耳環，能讓愛花人日日與花同行，每對售$60。

■紅底耳環配以彩繪小花作點綴，好有個性，售$50。

■手繪玻璃花瓶古典味濃，能為家居打造典雅情調，售$120。

CosyNook
地址：長洲大菜園路197號地下
電話：29812277
營業時間：11:30am-8:00pm

泰國花喱碌好開心

走入專賣泰國衣衫飾物特色小店，又有開心發現。原來老闆娘每隔兩、三個月就會親身到泰國入貨，佢仲多數會揀花花圖案或民族Feel至入貨，所以細小如耳環手鐲，大件如袋及衫褲，都係令人感到開心、熱情嘅花花Look。𠵱家衫、褲、裙都做緊85折，仲唔快手趁機轉個異國Look?!

■裙褲？係去玩、去沙灘嘅靚靚之選，售$139。

■側揹袋異國風情十足，備有多種顏色及圖案，售$69。

■炎夏快到，係時候入啲吊帶娃娃形小背心，售$59。

初出茅廬
地址：長洲新興街47號地下
電話：92203979
營業時間：12:00nn-7:00pm