一個奧斯卡，令「斷背」呢兩個字熱爆，一個奧斯卡，就令《Crash》同《Capote》呢兩套得獎作熱賣；其實上星期《煲碟王》都介紹過一堆奧斯卡提名同得獎電影，其中包括最佳電影《Crash》；今次點解又要再提？無他！皆因係碟場Sales推介的頂頭熱賣DVD，自套片得獎之後，隻DVD持續「日賣十幾隻」的紀錄，都咪話唔勁！
另外，以大熱姿態贏得最佳男主角獎的菲臘西摩荷夫曼，其得獎電影《Capote》（冷血字傳）就出咗美版1區，上次介紹時未到貨，今回補數。菲臘西摩荷夫曼已連續在金球獎、美國演員公會大獎同英國電影大獎中封帝，他在電影中飾演著名同志作家TrumanCapote，無論聲調、說話語氣以至小動作等，都同正版TrumanCapote一模一樣，而且舉手投足都好自然，憑乜打低對手膺影帝？買番隻返去慢慢嗒真啲菲臘西摩荷夫曼的演技。