中央政策組顧問劉細良之老師逯耀東於二月二十四日病逝高雄，香港嘅學生及逯教授在港讀書（碩士）及教學嘅單位新亞研究所，中文大學新亞書院中大歷史系定於三月二十六日星期日下午二時半，在新亞書院人文館為逯教授舉行追思會。
逯教授有好多學生，可能佢生前都未必記得劉細良係邊個，但最近劉細良紅吖嘛，咪講佢個名先囉，以引起注意啫。負責安排追思會嘅一位學生係科技大學人文學部副教授陳榮開，係劉細良嘅新亞歷史系師兄。點解左丁山知道劉細良係逯教授學生呢？讀梁家權嘅《沒有粉絲的碗仔翅》，劉細良作序，內有提及佢在一九八五年每星期到逯教授辦公室，單對單上課，逯教授同佢談天說地，由飲食文化講到大陸文化大革命，令劉細良眼界大開，勝讀十卷書，係佢四年大學生活最美好嘅回憶。
左丁山好耐以前就睇台灣《聯合報》副刊，最鍾意睇到逯教授講飲講食，佢可以從食一個饅頭，一碗麵，就可以洋洋千言，引經據典，講食物嘅來由，民間掌故以及如何炮製，方為之正斗，讀者大為折服。中國大陸對台灣人開放後，逯教授去咗三十幾趟，從南到北，從東往西，皆為覓食，專找尋常百姓嘅小吃。佢係江蘇人，當然返江南先啦，佢講到去蘇州品嘗傳統姑蘇菜與麵點，嘆息今非昔比，最令佢難過嘅，係四川味四處流竄，殺到去蘇州，姑蘇菜出現麻辣而且偏鹹，令佢食興盡失。
左丁山記得見過逯教授兩三次，身形肥胖，肚腩突出，成個食神相。大學教授之中，既講歷史研究，又講飲講食嘅，除咗佢，諗唔起第二位，無怪劉細良好懷念佢。左丁山唔係學者，冇睇過逯教授嘅歷史學術著作，相信好多逯教授嘅讀者，都只係會讀《已非舊時味》，《肚大能容》，《只剩下蛋炒飯》呢啲書啫。逯教授嘅門生故舊，如有時間，請參加追思會。