點樣先至可以喺人家地頭發展順利？八方估，最緊要係識做！好似大笨象滙豐銀行咁，繼前幾日喺中關村整咗間專服侍班優越理財客仔嘅支行後，噚日又有新搞作，同清華大學一齊開展「中國農村金融發展研究項目」，未來三年，大笨象會捐一千萬人仔，資助清華經濟管理學院班師生深入一啲偏遠窮困農村，研究當地金融市場狀況，同埋睇吓啲村民有咩金融產品需求。
就快退休轉行搞電話嘅滙豐主席龐約翰話，喺剛剛謝幕嘅人大上，中國政府仍然將發展農村經濟作為當務之急，咁大笨象作為一間入咗中國一百四十幾年嘅跨國企業，好希望資助吓呢個項目出啲綿力，希望對農村經濟有些少貢獻咁話……反應之快，真係值得其他企業借鏡！唔怪得之，滙豐可以快人一步入股交通銀行同埋平安保險。
爆料熱線：29290000、27860099
報料傳真：26239278
報料電郵：[email protected]