上星期確實唔憂無片煲，先有Fans必追的《哈利波特》，接着是拳拳到肉的《霍元甲》，還有啱一家大細睇的《四眼雞丁》。至於今個星期，率先落場就有港產片《最愛女人購物狂》；相比起韋家輝前兩套賀歲片《鬼馬狂想曲》同《喜馬拉亞星》，《最》大抵都係鬧劇一套，但題材似乎較貼身，購物狂？你我身邊隨時都搵到一、兩個，觀眾睇得易有共鳴！
記者：招佩珊 攝影：陳偉強
價錢：$68（a）
區碼：3區
發行：鐳射發行
聲效：DD5.1、Stereo
字幕：繁體及簡體中文、英文
於農曆新年檔期上映的《最愛女人購物狂》，睇番票房紀錄成績麻麻，上映12日僅收$600幾萬，與上映六日已收逾$1,300萬票房的《霍元甲》相差甚遠。不過碟場Sales話隻DVD賣得唔錯，有班後生客捧場，筆者剛剛踏入碟舖就有個廿歲頭男士攞住隻碟畀緊錢，怕且同韋氏出品不無關係。
都市縮影夠貼身
電影係講張栢芝係被棄置於百貨公司內的孤兒，長大後購買慾特別強，有嚴重的購物狂病徵，失業之餘又欠落大筆卡數，機緣下成為精神科醫生劉青雲的護士；栢芝以外，實情各人都有病，好似生性孤寒但有購物狂的陳小春、鍾意買A貨的CheapCheapCheap購物狂官恩娜，最諷刺係劉青雲自己亦有「選擇恐懼症」，能醫不自醫。記得羅家英在電影中講過「高壓城市，人人都有病」，都市百態，話唔定電影中主角正正係你同我的反映。大抵筆者饞嘴而購物慾唔算強，睇到有選擇恐懼症的劉，為食餐晏揀食乜都痛苦萬分，食排骨又驚豬鏈球菌、鯪魚球就怕孔雀石綠……真係心噏，心噏係因為身同感受也！
甘草演員勁搶鏡
戲裏、戲外都不脫購物癖本色的栢芝，硬係覺得佢喺戲內好似做番自己，導演選角確有一手；然而令電影更有睇頭者，係一眾勁好戲的甘草演員，好似夏春秋、王天林、羅家英等，當然仲有飾演殿堂級購物狂的小鳳姐，而儍兮兮的大肚婆護士邵美琪，亦是電影中的最佳點綴。
17分鐘搶親戲考耐性
分類為愛情喜劇的《最》，相信尾段由小鳳姐安排的迎親、搶婚多場四圍走戲份是全戲重頭，一眾演員被小鳳姐呢個心理學大師點來點去，搞笑成份係意料之內，可以話搵戲嚟做，但總算有紋有路兼有節奏感，透過玩心理替兩對新人解開心結，找出真愛，最後結局係點？總之，有情人終成眷屬啦！不過，睇呢段長達17分鐘的追追逐逐，真係少點耐性都唔掂，筆者睇到有點頭暈暈。
齋睇戲無Bonus
煲碟通常期待戲後甜品——BonusTrack，製作特輯也好、幕後人語亦好，始終戲院睇唔到；可惜碟內並無任何特別收錄，而DVD亦只得一個版本，無特別版、dts版，碟本身亦只提供DD5.1聲效，實情套戲無大爆炸、無動作打鬥，亦唔係Sell音樂，一碟電影的普通版夠晒，六十幾蚊買隻碟真係純粹為套戲，或者，隨碟附送的OnlineGame增值卡算是個小補償。
