無綫姐仔鍾嘉欣與楊思琦向來慳家兼啱傾啱玩，去年有傳兩人在番禺拍攝劇集《人生馬戲團》而成為好友。上周三，這對好姊妹秘密到九龍城睇中醫，原來她們竟合拍到一齊患上內分泌失調致經痛，需要執藥調理經期。睇症完畢，這對慳妹Twins即闖進成衣出口店選購十五元一條的內褲，能夠啱key若此，確實世上難求。
上周三（十五日）下午四時許，鍾嘉欣和楊思琦在西貢出席完劇集《人生馬戲團》宣傳活動後，前者即駕駛豐田EchoVerso，接載鍾嘉欣到將軍澳會合一名女伴，再驅車往九龍城福佬村道。
醫師爆響口
只見楊思琦匆匆把愛車泊到街頭泊車咪錶車位後，即偕鍾嘉欣和女伴步往附近的新城藥材舖。雖然店內有大批輪候者，不過鍾嘉欣與楊思琦甫進店內即獲優先接見，其他病人見狀亦不禁面黑黑竊竊私語。
約過了十五分鐘，鍾、楊與女伴睇症完畢，齊齊站在門外等候執藥。不久只見楊思琦領取四、五包藥，鍾嘉欣更拿了逾十包，付款後馬上頭耷耷離開。
據知楊思琦和鍾嘉欣今次聯袂睇中醫，因為兩人均受內分泌失調困擾，影響經期及皮膚質素。事後記者到該藥材舖打聽，曾為鍾、楊主診的黎守瓊中醫師即大爆兩女內分泌失調。
專揀廉價貨
黎醫師說：「佢哋偏燥嘅，都唔夠瞓。」再問黎醫師為兩人所開之藥方是否已包括調理女性經期之用？他說：「包埋，都係啲內分泌失調，調理吓就唔使生粒粒，好多女人經後都要調理身體。」
精打細算的楊思琦和鍾嘉欣睇完中醫，即結伴到專賣廉價衫的九龍城出口店shopping。兩人在店內專揀十五元一條、四十元三條的女裝底褲，但看了一會終於放棄，轉戰十蚊一件的廉價衫，可惜又掹又摷一大輪仍未揀啱心水，只好取車返歸，其間鍾嘉欣更乘坐楊思琦的順風車返抵將軍澳寓所，省回車錢。
此外，兩女昨日又聯同唐文龍等一眾《人》劇演員，到葵芳新都會廣場做宣傳。藝員分組大玩呼拉圈、魔術等技藝，鍾嘉欣一口氣玩三個呼拉圈，反觀好姊妹楊思琦則頻失手，慘遭取笑。
激吻錫扁鼻
談到與唐文龍在劇中有親嘴鏡頭，思琦說：「嗰場戲咀到鼻都扁，大家都好肉緊，佢又驚我尷尬，所以之前都溝通好先拍。」唐文龍則說：「嗰場戲拍咗廿幾分鐘，加上天氣熱，拍到流晒汗，真係攞命。」
採訪、攝影：娛樂突發組、卓寶花、仇志德
四物湯調經活血
體質同樣偏燥的鍾嘉欣與楊思琦，因為內分泌失調而影響月經，據余仁生藥業的黃醫師表示，此乃腎陰虛病狀，故涉痛經，需養陰加強活血，調經去瘀。六味地黃丸可針對腎陰虛，四物湯（即當歸、熟地黃、川芎及白芍）亦有活血之效。
黃醫師表示，如果經痛情況嚴重，蒲黃及五靈脂均為極佳的止痛物，最重要當然是由醫師辨症論治。黃醫師補充謂，經痛婦女除服藥調理外，亦須不偏食及做適量運動，宜戒吃生冷食物。
