口水會轄下嘅管治及政治發展委員會，噚日委任咗羅兵咸嘅合夥人雷添良、同埋港大副校長李焯芬加入，填補辭咗職嘅鄭大班同何安達嘅空缺。
呢個會係傾普選時間表同路線圖，雖然個會次次噴口水冇乜建樹，入唔入冇乜分別，但話晒大班應該都算係民主派，做吓花樽都好，可惜煲呔今次就委任咗兩個冇乜黨派色彩嘅人，口水會內嘅普選聲音肯定愈溝愈淡啦！
李焯芬真係好唔得閒，噚日佢又去出席「何鴻毅家族基金」嘅活動，個基金噚日宣布，會喺美國有百幾年歷史著名博雅學府高基大學（ColgateUniversity）成立獎學金，○六至○七年度會資助一個香港學生去嗰度就讀嘅學費同生活費。原來何鴻毅五十年代喺呢間大學畢業，佢個基金之前資助咗咁多文化活動，𠵱家終於有機會回饋母校喇。有興趣申請呢個獎學金嘅同學，可以到大學網站www.colgate.edu瀏覽詳情。
傳真︰2623-9278
電郵︰[email protected]