基於有人放晒風同埋個底夠硬淨，港交所主席李業廣一真被煲成新任證監會主席超班大熱，但噚日，某報用頗大篇幅話六十有九兼有哮喘嘅佢，因為身體狀況勁差，所以會聽醫生勸叫停所有公職，甚至連證監個位都唔do咁話，搞到佢噚日出席李志喜捐錢畀公開大學個party嗰陣，不停俾人「問候」。
咁實情係點?查理斯叔叔話，首先，寫個位大姐只係引述所謂消息人士，電話都無打過一個問佢老人家，第二，哮喘好多人都有，有呢個病係人都知要休息多啲，鄧麗君都係咁就去咗……總之，佢點都唔肯講係咪唔做證監主席，但就話明一定繼續做公開大學個校董會主席，照字面理解，即係佢唔係咩公職都放棄啦！
其實照八方用肉眼近距離睇，查理斯叔叔個款都唔似年紀大機器壞，淨係睇噚日空氣指數勁差，佢老人家傍晚六點幾，都仲鬼咁好氣兼精靈，話唔定整番兩件查理斯天使傍住就更醒神！總之，假如一齊做體檢，佢健康狀況應該會好過八方；至於你話佢以退為進，定係有人玩嘢？最後佢又可唔可以win出?八方真係唔知，只可以講，呢隻熱門老馬，眼睇就應該退役，但實情就有心有力，陪跑個啲唔好掉以輕心！
傳真︰2623-9278
電郵︰[email protected]