點樣捐錢畀啲大學先至唔會有命名風波？可以參考吓大律師李志喜。噚日，佢捐咗八百萬畀公開大學，成立一個「公開大學李冠春教育基金」，用嚟資助有經濟困難嘅苦學生。李冠春係邊個？就係佢、「亞瑟王」李國章同埋「寶Baby」李國寶等人嘅阿爺囉！
為咗隆重其事，公大噚日喺會展搞咗個基金成立儀式，李家唔少成員都有出席，包括李大狀阿爹李福善、堂兄李國章同老婆黛安娜、寶Baby個仔民橋等，連甚少露面嘅叔父李福兆亦有蒲頭，加埋好多個不知名但啲寶石鑽石大過八方隻眼的阿太……等大家知道……佢哋就係香港上流社會最叠友的李氏家族！
咁點解大狀捐錢？佢話因為好認同公大有教無類的精神！而李福善就話，伯爺冠春十四、五歲就冇書讀，之後響冇人幫忙之下，日頭做嘢夜晚進修，自學得一口流利英語，中文好就更不在話下，至於手書法，唔敢話至好但都無得頂！伯爺雖然慳儉，但就絕對唔孤寒供書教學啲仔女，而且亦好捨得捐錢畀教育界，而阿志喜咁做，可以話係秉承咗阿爺的優良美德！
傳真︰2623-9278
電郵︰[email protected]
