孖仔組合Soler喺台上夾band唱歌仔，台下蒲吧亦為威喂。
噚日凌晨，Soler行孖咇夜遊蘭桂坊，佢兩個同幾位朋友去蘇豪區Jessica酒吧隊酒傾偈，傾到兩點幾先至捨得走人。當時大孖Julio同一名男性朋友行先，雖然半夜三更，但Julio勁醒，一眼就昅到有記者，但佢依然鬼咁開心，喺街度同記者大聲講：「被你哋影到㖭！」
之後Julio拍一拍手掌，擺咗個黃飛鴻紮馬攤手嘅經典甫士。不過鬼鬼地嘅佢，連甫士都係半唐番，擺出嚟似尊特拉華達（JohnTravolta）喺電影《油脂》（Grease）嘅「揸住煲茶」指天篤地甫士，多過似黃師傅喎。
揮手拜拜超有品
冇耐細孖Dino同一男一女友人離開酒吧，佢先送女伴上的士，再行去會合大佬。Dino一樣咁盞，即刻放低個背囊面對記者，擺出耶穌受難甫士，跟住兩兄弟同記者講：「你哋畀一分鐘我呀！」原來係孖住上擺騎呢姿勢，玩完一輪後，先至同記者講拜拜。
Soler入行咁短時間，蒲吧遇記者唔單止態度大方，仲幾驚你唔影佢，擺多幾個甫士任你影，超識撈，前途無可限量呀！
