點為之世界盃超級Fans？日日唔瞓睇直播？飛去現場親身感受？未算瘋狂！有線電視嚴選出4位單身男士：資料搜集員龍華琛（Sam）、足球評述員/現役香港甲組球員馮嘉奇（馮奇）加埋攝影師及導演，在世界盃前親身遊歷決賽周國家，為期80日，體驗各國足球文化。最辛苦唔係時差，亦唔係舟車勞頓，而係完成後，6月5日尾站到達德國要立即回港，連開幕禮都冇得睇！
記者：陸伊琳 攝影：陳盛臣
馮奇：為世界盃同球隊決裂
雖說有線有Budget，沒有限制你食乜，又唔使瞓街，但旅程定比電波少年還要痛苦，據我做過旅遊記者經驗，一個月飛4個國家已是極限，兩個半月飛32個國家實在妙想天開，既有時差，又會水土不服、交通、治安問題……真是祝你們好運！
一生確實沒有多少這種機會，所以馮奇和阿Sam不用多想，便一口答應，家人既擔心但亦十分支持。可惜馮奇所屬球會對於他此舉略有微言，更面臨與球會決裂。問到阿Sam女友有沒有阻止，他同馮奇態度一致，這個機會不能錯失，而且好彩女友很贊成，不過佢補充話：就算反面都要去！
馮奇：最想病一定好難忘
真是大吉利是，馮奇鬼鬼馬馬咁話最想有更多的體驗，不如旅途中病一病，觀眾可能鍾意睇！結果俾人搶住鬧：你儍咗，出Trip來病，是十級辛苦，周圍的人好辛苦。兩個大男孩未出發笑料已多多。
四小強「世界盃八十日環遊世界」
5月1日起在有線電視播出
睇波團搞手：今屆最貴！
講踢波馮奇可能好耍家，但論到睇世界盃經驗，相信無人能及專搞睇波團的江國榮，七十、八十年代他從事體育記者及後也與足協共事過，94年起更專心搞起睇波團來，每年都會出外睇大大小小的球賽。近幾屆世界盃，他都親身飛去現場觀看，問到今年撲飛情況，他表示是歷年來最難撲的一年，價錢炒到飛起，決賽一場炒高成十倍，波飛要成三、四萬元一張，英格蘭、日本賽事的飛難撲度亦相等於決賽的門票，因為這兩個國家球隊Fans眾多又有米。「真是有錢都未必睇到，香港只有近百張門票配額，我現在都忙於同一班朋友、明星足球隊及熟客撲飛，我自己都會有得睇，但未知是邊一場。」
睇世界盃最少兩萬
今年去睇兩場初賽，連食宿及機票最平兩萬多元，要是睇準決賽及決賽的就4萬至6萬元，現在已有一團二、三十人成行。由於門票來得好散，又以一些冷門球隊居多，所以都好難組團，無理由使幾萬蚊睇伊朗、南韓啩！再者，市中心的酒店大部份亦被各國的足協及大公司包起，有些酒店房價亦炒到3萬元一晚，十分誇張！所以跟得團，入住的酒店都是郊區。
Tips：入敵營帶多件波衫
江生提提大家，去睇世界盃，除了交通要注意，最好隨身亦準備一些乾糧充饑，「好似98年世界盃法國一贏，全城陷入癱瘓狀態，到處都是人，車都行唔到，到深夜回到酒店餐廳已打烊。那一年決賽，我身為巴西球迷，身穿黃色戰衣坐入敵軍法國球迷當中，好彩法國贏波咋！」佢提提大家最好帶備多件波衫，就算買錯飛坐咗喺敵軍之中都不會太尷尬！
波衫舖老細：冇飛？去球場碰運氣
唔係教你炒黃牛，波衫舖老闆阿Roy上屆世界盃一行5人到日本睇波，但只有4張飛，點算？其實當中一位朋友「大眼仔」早就預了無得入場，來日本只是陪大家去旅行，誰知就在場外遇上一位德國球迷被朋友放飛機，結果花了$1,200入場，同德國佬坐山頂，相比阿Roy花了150美元第一行的正價門票無疑是貴了一點，不過都是值得的，大眼仔提醒大家記得帶備多些盤纏去Shopping，球場外真是有好多精品，好吸引！
睇波團最後衝刺
1.環宇足球（27174281/81022363）
江國榮表示會盡力去協助大家去撲門票，成功與否真是要看你要求要看哪一場球賽。酒店、機票連兩場球賽套票每位$20,000起。
2.康泰旅行社（21088777）
阿聯酋航空來回機票、酒店住宿及球賽門票套票每位$23,310起。
