當我還未看膩舊款Camry的時候，日本廠方正準備推出新車款，並已經火速運來全新第6代Camry，新車的車身、車廂和引擎輸出都變大了，比上一代震撼，設計也年輕了許多。那台3.5公升V6引擎勁過凌志ES300，而新6前速+/-半自動波箱，加主動式電子防護系統及氣袋，對比起其他同級車高下立見。
記者：陳偉林
攝影：楊錦文
ImageGirl：Lesley（TheGroup）
咁多代Camry，筆者至喜歡是上一代Camry大眼叮噹的外形，相比之下，最新版的Camry無論車首鬼面罩同兩旁大燈組合，看來似是收斂不少。之不過四輪拋沙板設計令車身闊度增加25mm之餘，予人穩重感；而一雙高聚焦頭燈及凸出的尾燈編排，給新車多一份內斂，看來新車經已用了大膽創新的思維，優雅和科幻並重咁話。
新Camry的車身尺碼其實不是大很多，但設計師懂得在車廂各處偷位，令空間大得驚人，以我的經驗，新Camry闊落程度直迫平治S-Class，設備十足，不看品牌的話，以Camry這個價錢，絕對可以成為平治的對手。
3.5公升V6引擎火氣十足
頂級Camry殊不簡單，皆因佢越級裝有一台媲美日產Cefiro350的3.5公升V6引擎，馬力輸出由原來Camry3.0的186匹激增至𠵱家的284匹，勁辣重不特止，佢還裝有一套6前速+/-半自動波箱，若然你只係用D波行車就未必有好激烈的反應，惟推入+/-波檔，深踩油門的話，啊！嗰種恍如駕馭跑車時候的黏背脊感覺，確實令人好High呢！快跑唔緊要，事關部車仲輔有被動的TRC和VSC幫你修正錯誤，Camry這部防打滑系統，是透過電腦搜集的行車數據來決定介入修正的強度，可以講是更加人性化。
High-tech冷氣離子簇淨化
至於話個車廂，真係可以用單一個「豪」字來形容，前後兩排以人體工學剪裁的高級真皮鑲嵌，我最喜歡係前排兩旁包得厚厚的椅背墊，貼服又唔會兩邊跣！再講，連帶後排兩邊椅背亦同樣具備角度調校，可惜係椅背唔可以放平直通尾箱，唔使諗住咁大部車可以存放長長的物件。
以享受的角度而言，佢內置PsychologicalAudioTheory音響又真係好High，隨機重備有6碟CD同MP3，加埋有離子簇淨化空氣功能的自動恒溫冷氣裝備，在置身加長有55mm前後軸距的車廂中，感覺又真係好Feel。
新車評級
加速 A
加大碼的一台全新3.5公升V6引擎作驅動，起跑加速感表現強而有力。
轉向 B
從輪胎傳來的路面感覺不錯，轉向反應輕盈教人有流暢性。
制動 C
碟式制動有主動式ABS、EBD同BA，可惜車身重，急煞車時仍有不足。
傳動 A
一套6前速+/-半自動波箱組合，轉檔反應利落易操控又好玩。
舒適 B
四輪懸掛柔韌又富支持力，出眾的吸震表現更教人留有深刻印象。
耗油量 C
以廠方數據9.8km/L（日本10.15模式）看來，約莫$1.3一公里的表現算唔錯。
車廂噪音 B
以中級豪華轎車而言，寧靜度出眾，但和凌志LS430相比，仍要努力。
評分標準：根據記者試車後的感覺給予評分，最好為A+，最差為E-。
出車資料
車價：$297,870
牌費：$7,664
保險：$14,960（以60%NCB計算）
出車總計：$320,494
供車計算機
車價：$297,870
首期：$29,787
利率：5.5% 年期：4年
每月供款：$6,814×48期
（以HirePurchase計算，只供參考）
豐田Camry3.5V6規格
引擎：3456ccV6DOHC
馬力：284ps/6200rpm
扭力：35.9kgm/4700rpm
傳動：6前速+/-半自動波
新車預售價：$297,870
車輛提供：皇冠汽車（28661020）