P場獵人黃家諾前晚又出擊，殺入國際品牌Fendi派對搵食，一邊食撻送香檳，一邊放電𠝹女，又食又拎滿場飛，更人盯人黐實一名靚洋妞，與對方咬耳仔兼咀面，完騷後還得戚地一拖二再蒲，惜被記者撞到正，惟有無奈將兩女放生。
逢P必到的黃家諾，前晚又到赤柱出席國際品牌Fendi時裝騷及派對，但醉翁之意不在酒，黃家諾只為搵食，面對秀色可餐提供，當然令他情緒高漲。現場見黃家諾飢腸轆轆，名副其實餓男覓食，全程手持香檳滿場飛，圍在漂亮洋妞身邊氹氹轉，一邊昅女一邊嗒酒，一有機會就黐到洋妞旁耳語說笑，每當有侍應手捧小食經過，即時伸出閃電手取撻及果仁當飯食。
兜勻揀獵物
黃家諾在場內兜來兜去，終於揀定獵物，睇中一名紮馬尾、穿白外套的美艷洋妞，黃家諾對她明顯嗒糖，不斷攝位竄到她身邊講笑，逗得對方十分開心。黃家諾見對方受落再展冧功，與她頭並頭咬耳仔，更借意咀她臉頰。
完騷後，黃家諾成功𠝹掂馬尾洋妞和另一名長髮外籍女子，不禁臉露得戚笑意，頭昂昂、雙手插袋，一拖二上吳彥祖的Audi舊車，直駛灣仔星街蒲下場，但中途黃家諾發現有記者追訪，迫於無奈在星街放生兩名洋妞。
忽然話當年
隨後黃家諾即在灣仔及中環一帶飛車撇甩記者，未幾記者再於中環Dragoni酒吧門外發現其車輛，直到凌晨五時，才見他獨自離場，相信因第二回合獵女失敗，故令他非常冇癮，逕自驅車返抵中環干德道全景大廈寓所。
前年黃家諾與舊愛關之琳分手後，經濟、運程及事業均全面下挫，前晚他在派對中身穿Fendi名牌服裝對記者說：「我九一、九二時喺歐洲做過Fendi男裝騷，下個禮拜去北京拍戲，會留兩個月。」不過這已是十四、五年前的陳年舊事，狀態大不如前的他前晚只能做座上客，被out出行騷行列。
以前黃家諾與之之同居於女方跑馬地半山利安閣豪宅，分手後大屋搬細屋，一支公遷到中環干德道，近月再搬到同街的全景大廈新竇，月租約為三萬多元。
採訪、攝影：娛樂突發組
