煲呔真係後發先至，八方當日已經叫佢要做到強政勵治，就一定要派人進駐九鐵，接收黎文熹嘅權力，然後進行大清洗，煲呔當然唔敢咁做，但係出嚟嘅結果都差唔多啦。
雙黎下台，其餘十九名總經理及主管收警告信，五個總監遲吓先同你算賬，仲想點？當然八方覺得煲呔最聰明係搵到詹伯樂（JamesBlake）回朝，何解？
詹老以柔制剛
第一，佢阿哥係老外，港英餘孽，同煲呔一樣做過高官（佢係工務司），明白晒政府運作，咁九鐵雖然話脫離政府，但係官樣文化冇變，所以一定要由佢哋自己人收拾番殘局。
第二，唔講唔知，伯樂兄最緊要係有人欣賞，佢簡直係工作狂，返工唔願放工，亦冇諗過退休，有人笑過佢係咪唔鍾意返屋企見老婆，所以由佢做行政總裁，一定唔會偷懶蛇王，更加唔會批准下屬亂放假去挺呢個，挺嗰個。
第三，大家以為政府臨時搵佢上馬，其實係一場誤會，因為冬冬同肥馬一早搵咗詹兄，叫佢幫手做兩鐵合併，今次臨危受命，可謂因利乘便。
第四，唔講唔知，詹老雖然下個月二號就七十二歲生日，但係佢身體唔知幾fit，因為佢平日喜歡打吓功夫仔，係柔道黑帶，田二少雖然惡死冇禮貌兼西化，但係只係得把口，人哋打得又有紳士風度仲係英國人，一定比田少西化，咁同田二少以英文溝通，肯定冇問題啦啩。呢一招真係以柔制剛囉，田二少欺善怕惡，今次冇得郁。
第五，詹兄識講嘢，唔怕肉麻話自己個心成日同九鐵在一起，𠱁得班九鐵前線員工好開心。
其實，政府一宣布由老詹代黎文熹，班前線員工已經放下心頭大石，因為大家係舊同事，作風脾氣大概都知道，唔怕被人賣豬仔。
九鐵鬧劇搞足一個星期圓滿落幕，特首辦心戰室發揮唔少作用，首先就放料話唔關特首事，要由九鐵管理局自己搞番掂，跟住就高姿態命令冬冬佢哋要做嘢，結果當日喺香港會上演完一套大團圓收場嘅好戲，唔到幾小時就移師去政府總部開批鬥會，執行家法要罰人，由外人發難，迫到黎文熹要壯烈犧牲自動遞上辭職信。
傳真︰2623-9278
電郵︰[email protected]