今年是世界盃年，可惜上屆歷史性打入決賽周的中國隊分組賽出局，不過別失望，尚有一支足令港人引以為傲的足球隊──曙光！在上屆露宿者世界盃，代表中國香港的曙光足球隊力挫瑞典、挪威、阿根廷，法國稱臣5比0，捷克更輸至7比1，隊中神射手昌哥更射入19球……今年9月，曙光再次出征南非，同世界列強決一高下，誰還敢說我們中國人屎波？
記者：羅灝汶
攝影：譚盈傑
神射手昌哥
露宿過半年，上年參加過蘇格蘭露宿者世界盃，想當年我都踢過甲組東方同愉園，有過光輝一刻㗎，不過自己爛賭輸清光，今年我轉做助教，希望幫到其他露宿者朋友啦。
阿森
仲好記得露宿嗰陣俾蚊叮到全身傷痕，雖然只係露宿咗2個月，不過生活的確好苦，經常無飯食，最尾識咗阿東仲加入埋球隊，𠵱家我有番晒自信心，仲搵到工㖭。
阿斌
之前爛玩搞到無晒錢，家人幫自己好多，但唔可以一世靠佢哋，露宿兩三個月搵過30份工都無人請，入咗隊之後生活有好大轉變，起碼三餐有着落，都有地方住啦。
骰仔
露宿過2個月，我知道社會都有人好樂意去幫我哋，我自己好鍾意球類運動，足球、乒乓球、桌球都啱，最想同外地足球隊交流，盡力爭取高名次，證明露宿者都係有用嘅人。
Paul
自己算半個露宿者，𠵱家仲瞓緊貨櫃，以前爛飲搞到生意失敗同家人分開，加入球隊後改過自新，起碼唔會再花天酒地，有做人目標都幾好吖。
David
同父母不和搬出嚟住，經濟出現好大問題，焗住做咗露宿者2星期，最慘係無飯食，好彩𠵱家搵到工，做人都開朗番，希望社會可以接納我哋。
隊員拉雜成軍
近年失業露宿者大增，香港社區組織協會（社協）於1999年展開「露宿者計劃」，當時社協從報章得知有關露宿者世界盃的消息，社區組織幹事及足球隊統籌吳衛東說：「希望透過足球幫班露宿者融入社會，燃點生活希望。」顏教練則說：「知道佢哋來自五湖四海，初初有啲隊員完全唔識踢波，我一步步教好佢哋囉。」
隊員當中，有荒廢自己的爛賭漢、骨瘦如柴的叔叔、令人望而生畏的金毛飛、中年發福的中年漢，難得人人投入。露宿者屋都無，何來經費？商界陳永柏、傑志領隊伍健等人身體力行幫助曙光足球隊，波衫有Nike贊助，屈臣氏則贊助蒸餾水，不過資源依然貧乏，所以隊員與社協朋友都積極籌款，為進軍南非籌措經費。
百般滋味在心頭
現在，好多隊員已經找到工作兼有固定居所，不過一談起昔日露宿街頭的悲慘境況，阿斌與阿森還是百般滋味在心頭。
街坊：傳媒宣傳不足
練習認真
每年一次露宿者世界盃
有別於真正世界盃，露宿者世界盃每年舉辦一次，對上3屆舉辦地點分別是奧地利（冠軍澳洲）、瑞典（冠軍意大利）、蘇格蘭（冠軍意大利），參賽隊伍來自27個國家，上屆香港隊以5勝4負2和成績排名21，香港神射手是周華昌（昌哥），總共射入19球，第4屆露宿者世界盃將於2006年9月21日至30日在南非好望角舉行。
賽制方面，32隊分8組，每組4隊打單循環，分組頭兩位爭1至16名，其他球隊爭17至32名，完成分組賽進入淘汰賽階段，首1至8名就會爭奪WorldCup，9至32名分別各有名次獎碟1隻。由於是4人球賽，每隊球員不能超過8人，犯規藍牌罰停賽2分鐘，紅牌驅逐離場，上下半場各7分鐘，非常之快上快落。
查詢網址： http://www.streetsoccer.org
曙光足球隊
網址： http://www.soco.org.hk/homeless
香港社區組織協會電話：27139165
如有人士想捐助，可致電社協查詢。