係Gamer都知，《FF》同《DQ》係家用機王牌RPG，推出前夕每每吸引成千上萬㗎仔通宵排隊，無他！正嘢自然多人追捧。最新《FFXII》被譽為PS2最後一隻RPG大作，未出已被日本權威Game書《Fami通》封咗佢40分滿分，係整個《FF》系列的首次！呢個消息搞到更多人對佢格外留意；到底係誇大定真係咁正斗？即睇！
文：陳福榮
「皇家」+「FF」=《FFXII》
有玩過GBA《FFTA》，大家可能對《FFXII》嘅設定覺得熟口熟面，例如除咗人類以外嘅生物種族、戴住巨大頭盔嘅判官、來自十二星座嘅召喚獸等，再加上「厚重感」十足嘅中世紀騎士世界觀，將舊世代《FF》史詩式風格徹底重現眼前。
無錯！負責設計今集嘅猛人就係當年憑《皇家騎士團》系列起朵，跳槽到SQUARE再做一隻令人歎為觀止《FFT》嘅松野泰己，雖然到《FFXII》製作後期佢因病被迫退下火線，但隻Game嘅基本框架都係出自佢手筆。比起趕客作品《FFVIII》同《FFX-2》，今集簡直係一洗頹風，齋睇長達5分鐘嘅CGOpening就知道古仔有幾堅，氣勢有幾磅礡！
《Fami通》史上滿分6大Game
日本Game書中權威《Fami通》評分緊好多人都知，經歷多個世代主機，曾給予「滿分」的遊戲共6隻，分別為N64《薩爾達傳說:時之笛》、DC《SoulCalibur》、PS《VagrantStory》、GC《薩爾達傳說：風之指揮棒》及NDS《任天狗》等；至於今次的《FFXII》就是最新鮮熱辣的第6隻；試想大家PS2都換過幾部、PS3亦喺年底殺到之際，終於等到一隻勁到爆晒燈嘅遊戲，實在好難叫人唔玩，而此亦可算為PS2畫上最完美的句號！
超勁畫面冠絕全球
如果話SQUAREENIX係整CGMovie最靚嘅遊戲公司，肯定冇人反對，尤其係睇到《FFXII》Opening就更加深信不疑，佢充滿電影感嘅剪接加上精雕細琢畫工，就算XBOX360遊戲都未必有咁正。當然有人會話Pre-render片梗正啦！不過佢平時交代劇情用嘅實時演算場面都做得非常正斗。至於城鎮同野外呢啲冒險地方，構造上都做得非常仔細，甚至令人會產生出「使唔使去到咁盡呀？」嘅感覺！
戰鬥似足「FFXIOffline」
《FFXII》戰鬥系統取材自MMORPG嘅《FFXI》，分別在於玩家隊中成員由真人變成電腦操作。遊戲提倡全實時作戰，所以喺森林呢類冒險地帶隨時都會撞見敵人，只要你引佢埋身或者走埋去直𡁻，就會即時進入戰鬥，完全唔使Load碟！今集亦引入TargetLine系統，是整個戰鬥命脈之一，玩家可從敵我雙方顏色連線睇到究竟邊個打邊個，從而迅速應對或改變戰術。因隊中成員改由電腦控制，事前就要Set好新增嘅Gambit系統，等隊員可以聰明啲咁去打，唔使有人就嚟死都唔識得補血。
執照盤決定角色一切
成長系統推陳出新係《FF》不變定律，過去嘅職業、魔石同Materia方式都各具特色，而今集好似國際象棋棋盤嘅執照盤就幾有《FFX》圓球盤嗰種風格，不過要喺有限資源下Tune個角色就幾乎一次都唔錯得。今次每個角色開始時，只有最基本技能，想用召喚獸、特技、魔法，都要先喺呢度花費LP學曉，亦即係話冇技能莫講補血，就連想着多啲裝備都唔得。另外今集打怪係近乎冇錢跌，解決方法是不斷打怪，將跌落嚟嘅寶物拎去賣，都算係單機版《FF》一大突破。
主機同梱版劈價搶客
SQUAREENIX都幾識得搵《FFXII》嚟搶錢，火速推出原聲大碟同插曲CD已不在話下，佢更聯同飲品公司推出貴夾唔抵嘅健康飲品；由於附送收集卡，所以早就掀起炒風。此外SONY亦為佢出咗部印有Game內判官文章嘅PS2同梱版，呢部特別版主機連Game原本叫價28,000日圓，但因為PS3延期所以有關方面將佢落價減至25,000日圓左右，希望多啲人買，暫時唔好游過隔籬塘住。至於本港遊戲店嘅售價目前係大約$2,000，是否抵玩就真係見仁見智。
名稱：FINALFANTASYXII
機種：PS2
生產商：SQUAREENIX
遊戲類型：RPG
遊戲人數：1人
價錢：$448
