世盃狂熱：一毫子都唔畀睇PPLive離譜！

歐冠盃踢到16強，世界盃開鑼在即，正正係收費電視搶客嘅重要關頭，可惜網上盜版猖獗，網友花幾分鐘下載PPLive軟件，隨即電影、日韓劇集、新聞台、醫學台等百幾個電視節目任睇，數最受歡迎一定係體育台，𠵱家人人對住個Mon免費睇各大聯賽，一毫子都唔使畀，咁仲成世界嘅？離譜啲喎。

記者：陸伊琳　攝影：陳盛臣　模特兒：Vicki、Jacky、家健、阿權

網上掀起睇波熱

問番蠱惑波迷網友，原來早於04年下半年已有呢類軟件出現，內地最先出現提供ESPN、電影等頻道嘅Coolstream軟件，但軟件唔穩定加上頻道唔多，所以愈嚟愈少人睇，隨後再出現PPStream、PPLive，令𠵱家免費網上睇波熱再興起。Coolstream同PPLive原理同出一轍，用嘅係P2P（Peer-to-Peer點對點）影像串流技術（VideoStreaming），傳統網站愈多人睇速度愈慢，P2P技術則愈多人睇愈協助到影像發放，唔單止速度更快，更可以做到邊下載邊播放，仲毋須成個檔案放入電腦，比起以前嘅非法解碼器更方便，加上節目頻道又多，所以唔少蠱惑波迷網友都廣泛使用，最重要係──一個崩都唔使出吖嘛。

節目包羅萬有

PPLive之所以受歡迎，全因為網羅晒大大小小電視台，你要睇英超？有！開廣東體育台，仲有合晒合尺嘅廣東話旁述㖭；你要睇歐冠盃？都有，轉去ESPN喇，不過論畫面清晰度當然不及合法解碼器，而且旁述時有時無，有時更加唔知旁述噏乜。除醫學台、性教育、國家地理頻道外，為迎合內地人口味，PPLive仲夠膽死增設幾個「周星馳電影台」，不停播放星爺嘅戲，再偏門啲甚至廣西、湖北等地方性電視台都有，服未？未服？喺韓國播緊嘅《宮》同日版《流星花園》配埋字幕畀你睇，仲與時並進到播埋奧斯卡頒獎禮，得獎電影《斷背山》、《藝伎回憶錄》照播！誇張？未算，內地報章同網站更有《PPLive創佳績超女演唱會直播成功》等高調到爆嘅新聞報道，又有電腦雜誌評佢為下載量最高10大共享軟件，驚死人唔知係盜版咁！

■PPLive的軟件十分易用，佔的空間不多，幾分鐘下載，隨即有百幾個電視節目任睇。

■電視節目種類五花八門，單是體育台已有多項選擇。

■網頁設計完善到爆，有埋節目表，慌死你唔識搵。

睇PPLive有機會入獄5年

有線電視點樣跟進？負責人表示𠵱家研究緊呢類軟件嘅發展，有必要時一定採取法律行動。鄧達明律師則指出目前本港處理呢類新興盜版手法嘅法例並不清晰，存有灰色地帶：「個人認為喺屋企收看屬私人用途，好難構成罪行，不過作為商業用途又另計。」因為啟動P2P模式，所有收看者都同時參與其中，而根據《版權條例》，企圖分發版權作品、侵犯版權複製品，達到損害版權擁有人都可定罪，一經定罪最高判入獄5年，大家咪以身試法呀。