近排嘅換樓潮有幾厲害，睇吓啲大型屋苑今個月成交量就知，馬鞍山最大屋苑新港城（圖），今個月到𠵱家已經有二十三宗成交，比上個月同期多咗超過五成，當中佔咗七成係換樓客。
據調查顯示，唔少租客或換樓客，都傾向轉買或者換入住開個屋苑，世紀21新港城分行經理梁偉倫話，換樓客喺住開嘅屋苑搵盤，都好普遍，不過好似以下呢個個案，買家喺同一屋苑一日內先賣後買，就比較罕有。
買家住開新港城兩房單位，由於有換樓需要，開始放盤，同時物色屋苑三房戶。佢睇中嘅三房單位，雙方傾價至尾聲，隨時可落實交易；同日佢個放盤，亦有買家洽購至最後階段，於是業主先以百七萬，賣出住緊嘅單位，隨即以二百四十萬買入近七百呎三房，呎價三千四百幾，同一日簽兩張合約，都幾難忘。