一向是Sennheiser忠實擁躉，大小型號用過十幾種，配Discman用開PX200，聲音清亮，樂器定位準，未煲熟前高音帶點金屬味，聽了多年已習慣了。但低音不夠厚、勁，聽Pop、Rock總唔夠癮！AKG的K26P是旺角德發商場地庫那間耳筒店店主大佬推介，嘩！低音果然正好多，高音當然沒有Sennheiser那麼清亮，但整體平衡好像更佳，聽GaryBertini那套兩嚿零水、唔食飯都要買的《Mahler》，舞台深度比我的Stax膽耳機還好（真想自殺！）。執筆時正聽着CocteauTwins那張精選，幾夠勁。最重要係價錢平過Sennheiser，好似唔使五百。暫時這個AKG配SONY的D-NE10是我最愛！不過耳筒那個金屬頭環好緊，推上推落成日扯甩我的頭髮，痛到彈起。應該罰負責設計那位仁兄每日又戴又除一百次，睇佢使唔使十日就變咗光頭。頂上那兩粒東西也頂住天靈蓋，戴得太久會唔舒服，所以我都係同PX200輪住用。