圍埋食飯，講完是非就討論娛樂八卦新聞，話題一轉兜到無記電視劇，想當年十個香港人九個無記電視劇送飯，討論劇情三日三夜都講唔完，可惜呢期扭開電視機，星期一至星期七都有衝動熄機。唔係得我一個咁話喎，街坊都有同感，當中又以《超級靚聲演鬥廳》同《棟篤狀王》最俾人喪插！
記者：許維雅
攝影：陳智良
無記唔掂節目
問題
A. 無記最應該腰斬嘅節目或劇集係邊套？
B. 點解？
C. 咁最懷念無記邊一套經典劇集？
Becky（學生）
A.《超級靚聲演鬥廳》。
B.一見到就即刻轉台，諗都唔使諗，無論主持、嘉賓都好老餅，節目好悶，請埋啲嘉賓年輕人又唔識，請都請啲我哋呢輩識先得㗎。
C.一時間諗唔到，總之以前啲節目好睇啲啦。
CHU（市場推廣）
A.《超級靚聲演鬥廳》。
B.唉～同之前阿姐嗰套都無分別，轉個名換主持又做多次，只適合阿媽阿爸睇，係都唔好星期日晚播啦，影響成個星期日嘅心情，兩個主持又老又唔識講嘢。
C.梗係《大時代》啦！劉青雲、周慧敏、鄭少秋都夠份量。
秦先生（學生）
A.唔知乜乜演奏廳（《超級靚聲演鬥廳》）。
B.伍衞國最衰，唔明點解佢可以同關菊英Deadair幾秒，你眼望我眼唔講嘢囉，嘉賓又係請男版肥媽張偉文，悶。
C.梗係《他來自江湖》啦！笑足十年都唔厭。
Kelvin（Sales）
A.梗係嗰套乜鬼《棟篤狀王》喇。
B.成套劇嘅劇情都好無聊，除咗黃子華同羅家英之外，其他角色一啲都唔吸引，大部份角色都係大陸演員，都唔識邊好睇㗎。
C.梗係《大時代》啦，最懷念丁蟹，故事緊張吸引。
Yan（學生）
A.《棟篤狀王》。
B.淨係識黃子華，太多大陸演員，好似睇緊大陸戲，好抗拒，劇情又悶。無綫唔應該買太多大陸戲返嚟，應該自己拍番多啲高水準劇集。
C.無乜邊套特別鍾意，無意見。
Jason（模特兒）
A.《棟篤狀王》。
B.劇情完全中國式笑話，睇唔明，人物角色亂晒龍，乜人都有又唔知講乜，我覺得有啲浪費咗黃子華，佢都好搞笑㗎，不過唔應該拍大陸劇囉！
C.我最鍾意睇黃日華嘅戲，我鍾意《馬場大亨》。
肥寶（學生）
A.《大鬧廣昌隆》
B.救命呀！《大鬧廣昌隆》重播好多次喇，播咁多次幾好睇都變得唔好睇唔好笑啦！情節老土又唔掂，啲主角都Out晒啦。
C.一向追開金庸小說，必撐《射鵰英雄傳》啦。
Phoenix（會計）
A.《天幕下的戀人》
B.周麗淇演得太作狀，故事唔合情理，點會認得細細個嘅初戀情人㗎？仲要撞返同一間公司做嘢，故事刻意拖長，鄭嘉穎同周麗淇年紀差一大截，都唔襯。
C.《大時代》啦！故事感情線鋪排得好好多，好感人。
奶仔（學生）
A.《放學ICU》
B.小朋友時段節目改革好多次，睇得出無綫刻意改變，不過愈變愈衰囉。節目無主題，叫小朋友學啲不切實際嘢，教壞小朋友，感覺好Hea。
C.我係周星馳Fans，首選《他來自江湖》。
Cathy（文員）
A.馬浚偉講鏢局嗰套（《鐵血保鏢》）。
B.題材唔啱睇，主角永遠都係做養仔俾人蝦，馬浚偉演得賴正氣，女主角係二線演員，唔夠卡士、演技，把聲好假好作狀。
C.最懷念都係華仔嘅《神鵰俠侶》。
總結
《棟篤狀王》同《超級靚聲演鬥廳》衰得叮噹馬頭，無記係時候執一執呢兩套劇，無謂激起反無綫民怨啦。
好睇劇集BoxSet
當真新不如舊，街坊齊撐無記舊劇，好彩坊間影碟舖仲有得賣，不過貨量唔多，最好賣嗰套《他來自江湖》仲差唔多斷市㖭。
售賣點
WideSight（23126683）
地址：尖沙嘴加拿分道20號加拿分廣場G01舖