恒指升72點，唔算大，但氣氛好好。如果昨日做窩輪炒家戰績調查，肯定贏家多過輸家好多。升幅超過20%嘅窩輪，有五十幾隻，當然屬於C輪；跌幅超過20%嘅，則兩隻手掌數晒。本港炒輪者，賭C嘅多過賭P，昨日自然贏家多過輸家。龍虎榜上，除咗兩隻（中移動與中芯）之外，由中銀同地鐵C輪包晒。
中銀C輪：中銀（2388）收15.65元，升0.40元。上龍虎榜大成交中銀C輪9812，收36.5仙，升103%，成交金額超過半億銀。9812喺5月8日到期（因5月初有勞動節及佛誕假期，早到4月28日最後買賣）。中銀習慣5月中以後先至除息（估計今回派41仙，增4%），所以股息唔關隻輪事，隻輪溢價3.3%就係3.3%，唔使計實際數據。槓桿率42.9倍（有效20.7倍），引伸波幅17%。到期之時，正股（現價15.65元）要升到16.17元先至打和。
唔適宜淨係睇住好有爆炸力嘅槓桿率做嘢，要睇埋溢價。9812值博率，比唔上9068同3670。揸低溢價嘅長壽命輪，心理壓力細好多。
地鐵C輪：地鐵（066）收18.05元，升0.90元。上龍虎榜大成交地鐵C輪9073，收1.99元，升44%，成交金額13球幾。隻輪6月杪夠鐘，負溢價0.3%，槓桿率9.1倍（有效8.2倍），引伸波幅17%。計數，9073最靚，所以隻輪升幅差不多係升得最多嘅地鐵輪。9196昨日升得較小，都唔錯。地鐵創新高，候技術調整，買C輪，9073與9196可以二擇其一。
章盛