立即倒數，2006德國世界盃重有82日！一眾波友、甚至是小記這種平日唔會睇波只睇世界盃的人都開始有度日如年Feel。梁漢文、森美同李璨琛都一樣等得好唔耐煩，幾位球衣上身Show晒Quali，娘炳同森美已經諗定點樣支持自己睇好的國家隊之餘，重話要操Fit減肥拉客預先打場友誼波……哼！佢哋就當然興奮雀躍啦，有機會親身飛去德國睇波，真係好唔抵得！
記者：黃藹瑩
攝影：譚盈傑
梁漢文、森美同李璨琛三個波友今次聚首一堂，完全係因為adidas做搞手的一個足球比賽。不過唔係呢個比賽，都唔知李璨琛原來識踢波、梁漢文有機會第三次現場睇世界盃支持法國隊、森美睇波睇得多但從未試過在香港以外的地方睇波。為咗打呢埸友誼波，三位都FullGear上身，有姿勢仲好似好有實際，即時表演一下畀你睇，得唔得就見仁見智，好彩呢場友誼波仲有幾位港隊同明星足球隊的猛人坐鎮。
琛仔：踢波去蒲一樣盡力
梁漢文同森美係一等一波友就係人都知，李璨琛原來識踢波就真係好令人出奇，就連佢自己都話：「好細個的時候就成日踢波，但大個咗就少踢咗，不過有時都會同朋友踢吓；至於睇波的日子就仲短，由之前嗰屆歐洲國家盃先開始沉迷，以前係朋友叫我我先出去睇波，𠵱家自己都會追嚟睇。」
家庭觀眾可能會認為森仔似個蒲友多過波友，要佢落場踢波掂唔掂㗎？點知琛仔都答得幾精警：「我踢波會同去蒲一樣咁盡力。」嚟緊4月30日的adidas比賽會點準備？琛仔暫時未想到，「到時比賽中場的位置當然係交畀我的隊長森美，我這種業餘的球技又一定唔會打衝鋒陷陣的前鋒啦，講速度的後衞應該會比較適合我。哈哈。」
娘炳：睇現場好似嘉年華
話說梁漢文同森美將會唔使錢，有人請佢哋去德國睇世界盃，再講一次，聽完真係好唔抵得！三人當中就只有娘炳有現場睇世界盃的經驗，話佢係最有經驗睇波友一點都無錯！2002年日韓世界盃及1998年法國世界盃娘炳都有去親身捧自己最愛球隊及偶像施丹，02年時的世界盃雖然距現在多一點，不過娘炳記憶好像還是對98年法國那一屆較為猶新。問到哪一場世界盃賽事最精采？「98年決賽法國對巴西！」立即脫口而出，一幕幕法國人如何慶祝、如何瘋狂，從佢口中小記都感受得到。佢仲話要去睇這類世界比賽提早到場最緊要，「早啲去到球場附近有着數，附近好似嘉年華咁，早啲去同自己人（一樣支持法國）玩埋一堆嘛！」
講番今次的比賽，一向在明星足球隊踢開中場的娘炳今次比賽既然做隊長，當然一樣會主力做番這個崗位。問身形都幾瘦削的他會打算怎樣操Fit自己迎戰時，佢話：「最近都是忙於拍劇，沒有甚麼時間可以去操，不過我都會盡量在比賽之前抽點時間落場踢吓。」
森美：練定酒量去德國
大學時代已是足球狂熱分子的森美最愛的球隊是德國，有「金色轟炸機」之稱又是德國國家隊教練的奇連士文更是他的偶像。知道今屆有機會親身到德國捧場的他極之興奮，一早已做好了準備，「數德國最出名的又點會少得啤酒？我𠵱家就已經練定我的酒量，等到時去到德國可以大飲特飲。」嘩！有時間就練吓波好過啦，唔怕飲到捧住個啤酒肚咩，四月尾點比賽呀！「唔怕，我𠵱家都好Fit，唔使話特登減肥去比賽啦，我哋嗰隊贏硬！」咁囂張？到時贏唔贏到就仲未知，不過𠵱家你哋隊個勢就一定勁過Edmond隊，鬼叫你哋士氣勁咁多咩！
查實森美今次咁興奮主要都係因為佢從未試過出國睇波，「場場波都係喺電視度睇，一啲現場感都冇！阿Edmond話其實開場之前有好多嘢睇，好似兩隊比賽球隊試波熱身喺電視係睇唔到的，而且又可以化晒妝去玩一餐，好正！」呢種咪叫做未出發先興奮囉！
兩隊陣容晒冷
梁漢文+10隊
吳國敬、鄧健明、歐偉倫（南華）、陳偉豪（澎馬流浪）
森美+10隊
葛文輝、李璨琛、張達明、李健和（晨曦）、文彼得（澎馬流浪）
一場廝殺即將開始
講咁耐佢哋將會在4月30日決一死戰，究竟喺邊度？有咩人？會發生咩事？原來一切廝殺都由adidas引起。adidas搵來梁漢文同森美這兩個波癡各自組隊，公開招募十位隊友，一齊參加於4月30日舉行的「adidas梁漢文+10大戰森美+10」球賽，現在先睇兩隊已有成員陣容，要投靠邊隊，自己諗清楚！唔好話唔提醒你，若有機會被選為賽事中的MVP（最有價值球員），仲可以奪得世界盃賽事入場券。
凡是所有熱愛足球、年齡又夠15歲或以上的話，可於即日至4月７日期間登入網頁：www.adidas.com.hk/football，又或者於「+10更衣室」填寫登記表格。
獎品：
1.2006FIFA世界盃之旅共三名（包括世界盃入場券連來回機票及酒店住宿）
2.冠軍隊可獲獎盃及獎牌
3.進入總決賽的30名球員可獲全套adidas最新足球裝備及adidas禮券總值$1,000
戰衣巡禮
世界盃雖然仲未到，但各國的球衣已經率先出籠，你可以買住止渴又得，話佢未比賽就已經賺你一筆都得！
adidas+Teamgeis2006年德國世界盃指定足球，打破昔日32皮縫合換以14塊真皮，令足球表面的接合點由原來的60個降低至24個，有效提高足球運行的精準度。
$700（專業球員版）
$300（普通版）
查詢電話：21493888
