本欄於三月九日談及柴魚花生粥，講到柴魚係乜嘢魚，請讀者提供資料。一位讀者司徒先生來電郵話：
「如果柴魚即日本之堅魚，應正名為鰹魚，日音Katsuo，英文Bonito，屬鮪魚科之一種，在大西洋，太平洋及地中海等海域均可捕獲。小弟因工所需對日本鰹魚曾作了些資料搜集，日本鰹魚主要用作風乾熏製成魚乾，堅若柴頭，是否因此叫柴魚就不得而知。本地柴魚與日本的鰹魚可能同科不同類，有待查證。一般製過之日本鰹魚多會刨成小片或碎絲，用來作湯底或成調料，是美味之源。由於鰹魚乾製工複雜需時甚長，售價亦昂，普通一塊動輒要數千日圓，貴過靚鹹魚。」
睇完司徒先生電郵，又學到嘢，謹公諸同好，如果其他讀者另有說法，請不吝賜教。柴魚花生粥唔知算唔算係民間小食，諗起梁家權寫嗰本《沒有粉絲的碗仔翅》，裏面提及好多街邊小食，𠵱家好似失傳咗或者大家怕唔衞生，唔敢再食。小時候喺街邊其實好鍾意食「豬粉腸花生豬骨粥」，現在一怕膽固醇過高，二怕豬牛內臟唔乾淨，怕怕咯。哈，點知呢日為咗家中老人食療，翻查江一葦醫師嘅著作，喺佢寫嘅《食療保健續集》（星島出版社，一九九五年十二月四版），第四百零五頁竟然搵到豬粉腸花生豬骨粥。據已故嘅江一葦醫師（生前每次診金收五百元）講：「此粥可治老人腎虛腰脊背痛，雙足由於虛弱而致痠軟無力，食慾不振體力衰退等症。」以豬粉腸兩具（約二百餘克），花生仁去衣二両（約六十克），豬骨連髓一斤（約六百克），白粳米両半（約五十克），至於製法，因原文甚詳細，不便抄錄，否則有呃稿費之嫌。
江醫師話好多人誤會豬粉腸內之粉糜係不潔之物，常棄之而只吃腸皮，實誤。至於粳米，成份與糯米相近，但含磷質較多，鈣質較少，功能滋養脾胃。左丁山以前試過江醫師其他食療，效果唔錯，呢碗「豬粉腸花生豬骨粥」，必要試吓。